Böyük Britaniya Kiyevdəki səfirliyinin əməkdaşlarının
bir hissəsini və onların ailə üzvlərini ölkədəki vəziyyətin gərginləşməsi səbəbindən
geri çağırmağa başlayıb. Bundan öncə ABŞ Kiyevi könüllü tərk etmək istəyən diplomatlarına
sərbəst seçim icazəsi vermişdi.
Maraqlıdır, indiki halda başda ABŞ olmaqla, Qərb
ölkələrinin diplomat ailələri Ukraynanı niyə tərk edir?
Mövzu ilə bağlı Sfera.az-a açıqlama verən
"Atlas” Araşdırmalar Mərkəzinin rəhbəri Elxan Şahinoğlu deyib ki, ABŞ və Qərb
ölkələri diplomatlarının ailələri ilə birlikdə Ukraynanı tərk etmək təlimatı vətəndaşları
olduqları ölkələrinin rəsmi qurumlarından gəlib.
"Bu yalnız Rusiyanın Ukraynaya hərbi
müdaxilə ehtimalının yüksək olmasıyla əlaqəli deyil. Ukraynanın müxtəlif şəhərlərində,
o cümlədən paytaxt Kiyevdə Rusiyaya bağlı "yatmış hücrələr” var ki, Moskvadan əmr
alan kimi istənilən təxribatı həyata keçirə bilərlər, bu sırada terror aktları
da istisna deyil. Ukrayna Donbas uğrunda müharibə apardığı illərdə Kiyev və
Xarkovda terror partlayışları olmuş, bu zaman Ukraynanın dövlət qurumlarının əməkdaşları
hədəf alınmışdı. Görünür, Qərb ölkələrinin kəşfiyyat xidmətləri Ukrayna şəhərlərindəki
"yatmış hücrələrin” yenidən fəaliyyətə keçəcəklərindən ehtiyatlanırlar”.
Turan Rzayev