“Arterial hipertenziya (hipertoniya) adətən yaşlılar arasında ən çox yayılan hallardan biridir, lakin buna uşaqlar arasında da rast gəlinir”.

Sfera.az bildirir ki, bunu pediatr Aynur Adıgözəlova deyib.

Onun sözlərinə görə, uşaqlarda arterial təzyiq göstəriciləri böyüklərdən fərqli olaraq, hər yaş qrupuna görə dəyişir:

“Uşaqlarda təzyiq müxtəlif səbəblərə görə yüksəlir. Ümumiyyətlə, arterial hipertenziya birincili və ikincili xarakter daşıyır. Birincili hipertenziya heç bir xəstəliyin ağırlaşması olmadan sərbəst şəkildə yaranır və hipertoniya xəstəliyi kimi də tanınır. Uşaqlarda bunun yaranma səbəbi çox ola bilər, o cümlədən irsi meyillik, psixoemosional gərginlik, passiv həyat tərsi, əmək və istirahət saatlarının qeyri-düzgün paylaşdırılması, keçid yaş dövrü, telefon asılılığı və s. İkincili arterial hipertenziya isə böyrək, endokrin, ürək-damar və s. sistemlərin xəstəliklərinin simptomu kimi yarana bilər”.

Mütəxəssis bildirdi ki, uşaqlarda yüksək arterial təzyiq adətən baş ağrısı, ürək bulanma, qusma, baş gicəllənmə, qulaqlarda küy, tez yorulma, qıcığa meyillilik, burundan qanın açılması kimi əlamətlərlə özünü göstərir:

“Bəzən simptomsuz keçir və təsadüfən təzyiqi yoxladıqda aşkarlanır. Amma bu o demək deyil ki, tanometrdə bir dəfə yüksək rəqəm gördüksə, bu, hipertenziyadır. Arterial təzyiqin ölçülmə qaydası və şərtləri var. Şərtlər düzgün icra olunmazsa, göstərici düzgün olmaya bilər. Bu da, öz növbəsində, valideynləri əsassız yerə həyəcanlandıra bilər. İstənilən halda əgər valideyn nədənsə narahatlıq duyursa, mütləq pediatra müraciət etməli və ixtisaslaşmış personal tərəfindən təkrar təzyiq ölçülməlidir. Arterial təzyiq uşağın sakit, oturaq vəziyyətində, arasında 3-5 dəqiqə interval olmaqla 3 dəfə ölçülməlidir. Eyni zamanda, ürək döyüntülərinin sayı və ritmi də qiymətləndirilməlidir. Yüksək arterial təzyiqin bir dəfə qeydə alınması heç də arterial hipertenziyadan xəbər vermir. Bunun üçün 1-2 həftə sınaq müddəti qoyulur və bu müddət ərzində təzyiqin göstəricilərini nəzarətdə saxlamaq lazımdır”.

Pediatr qeyd etdi ki, qeyri-sağlam qidalanma uşaqlarda arterial təzyiqin ilkin səbəbi ola bilər:

“Mütləq qida və yuxu rejimi normallaşmalı, az kalorili sağlam qidalara üstünlük verilməli, artıq çəki varsa, onunla mübarizə aparılmalıdır. Yeməklərdə duzu azaltmaq, ədviyyatlardan az istifadə etmək lazımdır. Heyvan mənşəli yağlar azalmalı, bitki mənşəli yağlara üstünlük verilməlidir. Karbohidrat, tünd çay, kofe, şəkərli içkilər, duzlu və ədviyyatlı çərəzlər, hisə verilmiş qida növləri minimuma endirilməlidir. Bunların əvəzində kalium və maqneziumla zəngin qida maddələri o cümlədən quru meyvələr, boranı, paxlalı bitkilər, gül kələm, brokoli, ərik, üzüm, şaftalı, dəniz məhsulları, eyni zamanda kəsmik, pendirin sərt növləri kimi qida maddələri istifadə olunmalıdır”.

Günay