Rusiyanın paytaxtı Moskvada 24 yaşlı İnquşetiya vətəndaşının açdığı atəş nəticəsində iki Yol Patrul Xidmətinin (YPX) əməkdaşı yaralanıb. Avtosfer.az “RenTV”yə istinadən xəbər verir ki, insident “Lenin” prospektində qeydə alınıb.

Məlumata görə, adı çəkilən prospektdə xidmət aparan iki YPX əməkdaşı, taksi fəaliyyəti göstərən avtomobili saxlayaraq yoxlama aparıblar. Bu əsnada sürücü, 24 yaşlı inquşetiyalı Ratmir Qalaev onlara travmatik tapançadan atəş açmağa başlayıb. Asayiş keşikçiləri tabel silahlarından cinayətkara cavab atəşi açıblar. Nəticədə hər iki polis əməkdaşı və hadisəni törədən şəxs güllə yarası ilə xəstəxanaya çatdırılıblar. Polislərdən birinin vəziyyəti ağırdır.

Bildirilir ki, həkimlərin bütün səylərinə baxmayaraq, 24 yaşlı Ratmir Qalaevin həyatını xilas etmək mümkün olmayıb.

Faktla bağlı cinayət işi açılıb, əməliyyat-istintaq tədbirləri davam etdirilir.

Namiq Musayev