İstanbulda lüks avtomobilin hava yastığını oğurlayan qarətçilərin görüntüləri təhlükəsizlik kamerasına düşüb. Avtosfer.az xəbər verir ki, insident ötən gün Əsənyurd rayonunda qeydə alınıb.

Kadrlarda, avtomobillərin park edildiyi əraziyə bir maşının yaxınlaşdığı və dayanacaqda boş bir yerə park edildiyi görülür. Avtomobildən düşən şübhəli ətrafa göz gəzdirir, sonra da park edilmiş ağ avtomobilə yaxınlaşır. Maşının yan şüşəsini sakitcə qıraraq hava yastığını çıxarır və geri qayıdaraq öz avtomobilinə minib ərazidən uzaqlaşır.

Səhər saatlarında qarət olunan "Mercedes" markalı avtomobilin sahibi Səlçuk Əfəndioğlu, avtomobilinin şüşəsinin qırıq olduğunu və “airbak”ının da olmadığını görərək polisə müraciət edib.

Deyilən ünvana gələn asayiş keşikçiləri nəqliyyat vasitəsinə baxış keçirib və maşının üzərində olan barmaq izlərini götürüb.

S.Əfəndioğlu, bir neçə ay əvvəl də analoji hadisəni yaşadığını bildirib. O, şikayətçi olacağını söyləyərək dəyən ziyanın 2,500 – 3000 (720-860 AZN) lirə olduğunu deyib.

Faktla bağlı təhqiqatlara başlanılıb, şübhəlilərin tapılıb yaxalanması üçün əməliyyat-axtarış təbirləri görülür.

Namiq Musayev