Astarada yük və minik avtomobilləri toqquşub, üç nəfər xəsarət alıb. Avtosfer.az-ın "Report"a istinadən verdiyi xəbərə görə hadisə Ələt-Astara magistralının Astara rayonu, Təngərüd kəndi ərazisində qeydə alınıb.

Belə ki, kənd sakini, 1994-cü il təvəllüdlü Təngərüd kənd sakini Əhməd Sabutay oğlu Əsgərovun idarə etdiyi "90-MR-526" dövlət qeydiyyat nişanlı "Mercedes" markalı minik avtomobili həmkəndlisi, 1965-ci il təvəllüdlü Arzu Əlislam oğlu Əsgərovun idarə etdiyi "99-GE-476" dövlət qeydiyyat nişanlı "Ford" markalı yük maşını ilə toqquşub.

Qəza nəticəsində 3 nəfər xəsarət alıb. Yaralılar Lənkəran Rayon Mərkəzi Xəstəxanasına çatdırılıb. "Mercedes"in sürücüsü Ə.Əsgərov və sərnişini, 1993-cü il təvəllüdlü Ramiz Pərviz oğlu Əsgərov Reanimasiya şöbəsinə yerləşdirilib. R.Əsgərovun vəziyyəti daha ağır olduğundan Bakıdan həkim briqadası çağırılıb. Digər yaralı, yük avtomobilində olan sərnişin, 1972-ci il təvəllüdlü Kəmalə Şair qızı Allahverdiyeva isə Travmatologiya şöbəsinə yerləşdirilib.

Qəzaya səbəb "Mercedes"in qarşısına iribuynuzlu heyvanın çıxması olub.

Faktla bağlı araşdırma aparılır.