Qarabağ bölgəsinə sərnişindaşıma fəaliyyətinin genişləndirilməsi çərçivəsində iyunun 25-dən etibarən Bakı-Füzuli-Bakı şəhərlərarası müntəzəm avtobus marşrutu istifadəyə verilir. 
Avtosfer.az xəbər verir ki, Dövlət Avtomobil Nəqliyyatı Xidməti marşrut üzrə müvafiq qiymətləndirmə aparıb, hərəkət sxemi hazırlayıb və dayanacaq yerlərini müəyyən edib. Bilet satışı onlayn qaydada həyata keçiriləcək. 
Vətəndaşlar www.yolumuzqarabaga.az portalı vasitəsilə onlayn bilet ala bilərlər. Biletin qiyməti bir istiqamət üzrə 9 manat 20 qəpikdir. Reyslər həftədə bir dəfə olmaqla şənbə günləri təşkil ediləcək. Sərnişinlər gediş və qayıdış biletlərini əvvəlcədən eyni vaxtda sifariş etməlidirlər.
Vətən müharibəsi qəhrəmanları, Milli qəhrəmanlar, şəhid ailəsi üzvləri və Qarabağ mühasibəsi əlilləri üçünsə biletlər ödənişsizdir. 
Bakı-Füzuli-Bakı şəhərlərarası müntəzəm avtobus marşrutu üzrə sərnişindaşımanı həyata keçirəcək sürücüləri Azərbaycan Minatəmizləmə Agentliyi (ANAMA) mina təhlükəsizliyinə dair təlimlərə cəlb edib və onlara əsas təhlükəsizlik qaydalarına dair Təlimat kitabçaları təqdim olunub.
Sərnişinlərin məlumatlandırılması və təlimatlandırılması üçün avtobuslarda mina təhlükəsizliyi ilə bağlı videoçarxlar nümayiş etdiriləcək. Həmçinin hər bir oturacağın üzərinə mina təhlükəsizliyi ilə bağlı təlimat broşürü yerləşdiriləcək.
Daşımaların təhlükəsizliyinin təmin edilməsi məqsədilə avtobusları Daxili İşlər Nazirliyinin yol-patrul xidməti avtomobillərinin ekipajları müşayiət edəcək. Həmçinin avtobuslarda polis əməkdaşlarının olması da nəzərdə tutulub.

Nərminə Əli