Azərbaycanın “ADY Konteyner” və Avstriyanın “Rail Cargo Group” şirkətləri malları Çin/Mərkəzi Asiya-Avropa istiqamətində və əks istiqamətdə daşınması üçün vahid logistik məhsul təqdim edəcək.

Avtosfer.az xəbər verir ki, bunu “Railfreight” portalına müsahibəsində “ADY Konteyner” MMC-nin direktoru Natiq Cəfərov deyib. Onun sözlərinə görə, “ADY Konteyner” və “Rail Cargo Group”arasında imzalanan memorandum çərçivəsində, “ADY Konteyner” Avropadan Mərkəzi Asiya və Çin sərhədlərinə qədər yük daşıyacaq: "Yüklər “TITR” konsorsiyumu adından Bakı-Tbilisi-Qars dəmir yolu ilə Bolqarıstan-Türkiyə sərhəd-keçid məntəqəsi olan Kapıkuledən, həmçinin Rumıniyanın Konstansa limanından Gürcüstanın Poti və Batumi limanları vasitəsilə daşınacaq. Almaniyanın “Metrans" və Polşanın "TE Bahnoperator" ilə əməkdaşlıq çərçivəsində, biz, Bakı-Tbilisi-Qars xətti və Konstanta-Poti/Batumi istiqamətində yükdaşımaları həyata keçirəcəyik". N. Cəfərov bildirib ki, "Metrans"ın təmin etdiyi vaqon platformaları, Avropadan Qars stansiyasına qədər hərəkət edərək Avropa ilə fasiləsiz əlaqəni təmin edəcək: "TE Bahnoperator" ilə birliktə Çin-Avropa istiqamətinə fokuslanacağıq. Biz, bu şirkətlə sınaq qatarının Çinin Kaşkar əyalətindən Qırğızıstan, Özbəkistan, Türkmənistan, Xəzər dənizi, Azərbaycan, Gürcüstan, Türkiyə və Avropa ölkələrindən keçməklə yeni marşrutla Avropaya hərəkətini müzakirə etdik”.