Sfera.az-ın məlumatına görə, bununla bağlı politoloq Nazim Cəfərsoy deyib ki,  Rusiya ilə Ukrayna arasındakı siyasi müzakirələrin əsas çərçivəsi mart ayının sonunda daha aydın görünəcək. O vurğulayıb ki, hələlik tərəflər diplomatik müzakirələrdə maksimum tələblərlə çıxış edirlər:

"Amma zamanla hər iki tərəf müzakirələrin gedişatına uyğun olaraq, mövqeyini nisbətən daha yumşaldacaq. Bu müzakirələrdə hücuma məruz qalan Ukraynanın mövqeyi realpolitika baxımdan daha zəifdir. Fikrimcə, Rusiya diplomatik masada üstünlüyü daha da gücləndirmək üçün müharibəyə ən az martın sonuna qədər davam edəcək.  Bu həm də Moskvaya Qərblə prosesi razılaşdırmaq üçün lazımdır”.

Politoloq əlavə edib ki, ümumilikdə Rusiya ilə Ukrayna arasındakı müzakirələrin nəticəsi bir tərəfin "qazandım" deyə biləcəyi razılaşma olmayacaq:

"İmzalanacaq razılaşmada  bu prosesin bütün tərəflərinin - Rusiya, Ukrayna, Qərb, separatçılar, üçüncü tərəflər -  "qazandım" deyə biləcəyi məqamlar təbii ki var. Ancaq sözügedən anlaşmanın çərçivəsinin müəyyənləşməsində savaş meydanındakı real mənzərə əsas amil olacaq”.