Türkiyənin TUSAŞ şirkəti ölkənin ilk səsdən sürətli Pilotsuz Uçuş Aparatını (PUA) təqdim edib.
Avtosfer.az xəbər verir ki, bu barədə Türkiyənin “SavunmaSanayiST” hərbi nəşri öz mənbələrinə istinadən məlumat yayıb.

Milli resurslarla inkişaf etdirilən supersəs PUA-sı mühüm vəzifələri yerinə yetirəcək.

Sınaq fəaliyyətləri davam edən PUA şirkətin digər istehsalı yüksək sürətli “Şimşek” hədəf PUA-larından əldə edilən təcrübə ilə hazırlanıb.

Şirkət supersəs sürətə malik PUA-nın çoxsaylı prototiplərinin istehsalını tamamlayıb və onlarla müxtəlif sınaqlar həyata keçirir. Səsdən sürətli PUA radioelektron hücum, radioelektron dəstək və yalançı hədəf kimi bir çox kritik tapşırıqları yerinə yetirə biləcək.

PUA ən mühüm vəzifəsi “saxta hədəf” olmaq olacaq. Bu zaman PUA-dan düşmənin Hava Hücumundan Müdafiə sistemlərinin məhv edilməsi (SEAD) missiyalarında istifadə ediləcək.