Sfera.az-ın məlumatına görə, bununla bağlı idman eksperti Sənan Şəfizadə Qurban Qurbanovun addımını doğru hesab etdiyini bildirib:

"Bir qol hər zaman qələbə gətirmir. Amma bəzən bir qərar bütün dünyanın hörmətini qazanır. Təkrara baxanda onsuz real vəziyyət aşkar görünür. Yalan deyil, Qurban bəy həqiqəti söyləməyi tələb etdi. Ədaləti seçdi. "Qarabağ"ın adına ancaq həqiqət yaraşır!”.

Millət vəkili Fazil Mustafa isə "Qarabağ”ın oyunda uduzduğunu, lakin Qurban Qurbanovun ədaləti udduğunu vurğulayıb:

""Qarabağ" yenə də sonadək tökülmədən oynadı. İndi fikrimcə, texniki qabiliyyəti olanlar "Bazel"lə oyunda qapıdan keçən qol verilməyəndə Avropa klubunun məşqçisinin davranışı ilə əllə vurulan qolun verilməsindən sonra etiraf edilməsini təkid edən və qolu ləğv etdirən azərbaycanlı məşqiçinin müqayisəli davranışını videosüjetdə ingiliscə anlatmaq yerində olardı. Belə məsələni hökmən təbliğ etmək lazımdır. Oyundan daha önəmli ədaləti qazanmaqdır”.

"Rekord.az" saytının baş redaktoru Kənan Məstəliyev qeyd edib ki, Qurban Qurbanov Avropaya, onun ikili standartlarına tarixi zərbəni vurdu:

"Artıq futbol, qələbə və ya məğlubiyyət, turun keçilib-keçilməməsi ikinci plandadı. "Marsel" kimi rəqiblə oyunu "çevirmək" şansını nahaqqa qurban vermədi Qurbanov. Bu addımı təsvir edəcək, deyiləcək söz yoxdur. Artıq məşqçimiz başda olmaqla,  "Qarabağ" bu qarşılaşmanın da, turun da, mövsümün də qalibidir”.