İctimai Televiziya və Radio Yayımları Şirkətindən verilən məlumata görə, ölkəmizi İtaliyanın Turin şəhərində "Səs Azərbaycan" müsabiqəsinin qalibi, ifaçı Nadir Rüstəmli təmsil edəcək.

Sfera.az bildirir ki, Rüstəmli bundan qabaq da Azərbaycanı uğurla təmsil edənlərdən olub. Belə ki, o, 2019-cu ildə "Youthvision” Beynəlxalq mahnı müsabiqəsində 21 ölkə arasında 2-ci yerdə qərarlaşıb. 

"Eurovision 2022” təmsilçimiz 8 iyul 1999-cu ildə Salyanda anadan olub. 2005-2016-cı illərdə Salyan rayonu 3 saylı tam orta məktəbdə təhsil alıb. 2016-cı ildə Azərbaycan Turizm və Menecment Universitetinə qəbul olan Nadir  2021-ci ildə həmin universitetin məzunu olub.  O,  uşaq yaşlarından musiqi ilə məşğul olmağa başlayıb.

Məktəb illərində Qulu Əsgərov adına musiqi məktəbində piano və solfecio üzrə 7 illik musiqi təhsili alıb. 2017-ci ildə Tələbə Baharı Ümumrespublika Mahnı Festivalına qatılıb ikinci yerin qalibi olub.  2021-ci ildə Azərbaycanın "İctimai TV" kanalında yayımlanan "Səs Azərbaycan" layihəsində iştirak edən Nadir,  ilk mərhələdə "Writing'S on the wall" mahnısını ifa edib və müğənni Eldar Qasımovun komandasında yarışmağı seçib.

Xatırladaq ki, İtaliyanın Turin şəhərində keçiriləcək və şüarı "The sound of beauty" ("Gözəlliyin səsi") olan "Eurovison 2022" mahnı müsabiqəsinin yarımfinal mərhələləri may ayının 10 və 12-də, final mərhələsi isə mayın 14-də "PalaOlimpico"da baş tutacaq.