Lukaşenko Ermənistanı hədələyir - Moskvanın strategiyası, Bakının “B” planı

09 Fevral 2022 | 12:06

OXUNUB: 592

"Rusiyanın ekspansiya təbliğatını aparan Belarus Prezidenti Aleksandr Lukaşenko Moskvanın Ermənistanı tamamilə öz orbitində boğacağına anons edən açıqlama ilə çıxış edib. MDB məkanında cərəyan edən hadisələrin ölçüsünün böyüyərək digər ölkələrə sıçraması ehtimalları getdikcə güclənir”.

Sfera.az xəbər verir ki, bunu siyasi məsələlər üzrə ekspert Aqşin Kərimov deyib.

Onun sözlərinə görə, Rusiyanın ambisiyaları Moskvanın yeni modelə ehtiyacını ortaya çıxarır və Kreml SSRİ modelli bir ittifaq yaratmağa can atır:

"Qazaxıstan hadisələri zamanı Aleksandr Lukaşenko oxu Özbəkistana yönəltmişdi, indi isə o, Moskvanın təlimatı ilə Ermənistanı hədəf alır. Lukaşenko rusiyalı jurnalist Vladimir Solovyovun "YouTube”da yayımlanan "Solovyov Live” verilişinə verdiyi eksklüziv müsahibədə deyib ki, Ermənistanın çıxış yolu yoxdur: "Ukrayna əgər səhvlərə yol verməsə, 15 il ərzində bu "təhlükəsizlik məkanında” yer ala bilər. Ermənistanın çıxış yolu yoxdur. Sizcə, onlar kiməsə lazımdır? Onlar artıq bunu gördülər”.

"Azərbaycanla Türkiyənin strateji müttəfiqliyinin xarakteri elə qurulub ki, bu həm digər ölkələrə yönəlməyib, həm də birgə müdafiə mexanizmlərini gücləndirir - Lukaşenko bunu da dilə gətirib. Amma Lukaşenko digər ölkələrin - Türkmənistan, Özbəkistan və Tacikistanın öz ehtiyaclarına görə Rusiyanın patronajlığı altında yaranacaq hansısa ittifaqa qoşulacağını bildirib”, - deyə politoloq əlavə edib.

Ekspertin sözlərinə görə, Lukaşenkonun dedikləri Kreml divarları arasında Ermənistana dair planların mövcudluğunu göz önünə gətirir:

"Rusiyanın İrəvan qarşısında şərti budur ki, o Qərblə təmasların siyasi gələcəyini Moskvaya qarşı yönəldən akta çevirməsin və zamanla Rusiyanın iradəsi altına keçsin, daha doğrusu vassallığını elan etmiş olsun. Ermənistan onsuz da Rusiyanın forpostu kimi ad çıxarıb, amma Nikol Paşinyan hakimiyyətə gəldikdən sonra eyni anda iki stulda oturmaq siyasəti yürütdü ki, bu da Kremlin qəzəblərini alovlandırdı. İndi isə Kreml NATO ilə qarşıdurma fonunda özünün əzələlərini nümayiş etdirmək üçün çevrəsinə daha çox ölkə çəkmək istəyir. Rusiya Ermənistandan istədiyini ala bilməsə, bu ölkənin taleyinə yeni qara günlər yazılacaq. Bu da nəticə verməsə, Rusiya Gümrüdəki hərbi bazasının gücünü İrəvana yönəldəcək”.

A. Kərimovun sözlərinə görə, Lukaşenkonun dediyindən belə nəticə hasil olur ki, Moskva Bakıya müdaxilə edə bilmir:

"Şuşa Bəyannaməsinin imzalanmasından sonra Azərbaycanın qətiyyəti Türkiyənin zəmanəti altında daha da gücləndi, Bakının bərabərməsafəli xarici siyasəti Moskvanı narahat etmir. Təbii ki, Rusiya Azərbaycanı özünün ittifaqında görmək niyyətindən vaz keçməyib, amma bunun üçün addımları sadəcə təklif verməkdən o yana keçə bilmir. Lukaşenkonun bəyanatı həm də o deməkdir ki, Rusiya Qarabağ məsələsində açıq qalan bir çox məsələnin Azərbaycanın xeyrinə yekunlaşması üçün Ermənistanı təzyiq altında saxlayacaq və bu rıçaqdan Ermənistana qarşı alət kimi istifadə edəcək.

Rusiyanın təbliğat dili olan Lukaşenkonun açıqlaması Azərbaycanın Ermənistana qarşı yaranan cəbhədə əlini gücləndirir və gözlənilən ssenarilərə qarşı "B” planını aktuallaşdırır. Yəqin ki, bundan sonra Paşinyan hansısa öhdəlikdən boyun qaçırsa, buna cavab olaraq Bakı-Moskva trafikində birgə müzakirələr aparılacaq və Paşinyanı cəzalandırmaq üçün yeni mexanizmlər formalaşdırılacaq. Azərbaycanın "B” planı heç də sadəlövh tezisə əsaslanmır, Bakı həm də Moskvadan "əsən küləklərə” qarşı da bufer zona yaradır. Son zamanlar Azərbaycanla Türkiyə arasında artan hərbi-siyasi təmaslar bu bufer zonanın koordinatlarını, məqsədlərini aydınlaşdırmaq məqsədi daşıya bilər”.

Turan Rzayev

Sosial şəbəkələrdə paylaşın: