20 ilə yaxındır Bakı şəhərində müntəzəm sərnişindaşıma fəaliyyəti göstərən “Xaliq Faiqoğlu” şirkəti xidmət keyfiyyətinin daha da artırılması, sərnişin məmnuniyyətinin yüksəldilməsi məqsədilə müxəlif layihələr icra edir. 
Bu layihələrin davamı olaraq fevralın 22-də “Xaliq Faiqoğlu” şirkətinin Bakı şəhər Yasamal rayonu ərazisində yeni istehsalat bazasının və müasir AVRO-6 standartlarına cavab verən, ekoloji təmiz CNG yanacaq mühərrikli “OTOKAR KENT LF CNG” markalı avtobusların təqdimatı mərasimi keçirilmişdir.
Tədbirdə çıxış edən şirkətin idarə heyətinin sədri Faiq Seyidov yeni istehsalat bazasının paytaxtın ictimai nəqliyyat infratstrukturunda əhəmiyyətli yer tutacağını bildirib. Burada eyni vaxtda 200-ə qədər iritutumlu avtobusun park edilməsinin mümkünlüyünü, həmçinin onlara texniki xidmətin göstəriləcəyini qeyd edən F.Seyidov istehsalat bazasında “Azpetrol LTD” MMC tərəfindən müasir yanacaqdoldurma məntəqəsinin qurulduğunu əlavə edib.
Həmçinin qeyd edilib ki, “Xaliq Faiqoğlu” şirkəti “PAŞABank” ASC ilə sıx əməkdaşlıq çərçivəsində Türkiyənin qabaqcıl avtobus istehsalçılarından olan “Otokar Savunma Sanayi A.Ş”dən müasir emissiya standartlarına tam cavab verən avtobusların alınması layihəsini icra edir. Layihə çərçivəsində ölkəmizə gətirilməsi nəzərdə tutulan 120 ədəd iritutumlu nəqliyyat vasitələrinin 50 ədədi artıq Bakı “Xaliq Faiqoğlu” şirkətinə təhvil verilmiş, geridə qalan bir neçə gün ərzində onlara müasir ödəniş cihazları quraşdırılmışdır. Sabahdan, yəni 23 fevral tarixindən bu avtobuslar marşrut xətləri üzrə sərnişinlərin xidmətinə veriləcəkdir.
Şirkət rəhbəri bildirib ki, Bakıya gətirilmiş 50 yeni avtobusdan 2 ədədi 18,70 metr olmaqla qoşqulu və 4 qapılı nəqliyyat vasitəsidir ki, bu da pik saatlarında sərnişin axınının yüksək olduğu istiqamətlərdə insanların rahat və təhlükəsiz daşınmasında xüsusi rol oynayacaq: “Prezident İlham Əliyevin sahibkarlığa göstərdiyi ali qayğı və diqqət bu gün ölkəmizdə qeyri-neft sektorunun inkişafına ən böyük dəstəkdir. Daim dövlətimizin dəstəyini yaxından hiss etmişik və bu bizi yeni layihələr həyata keçirməyə ruhlandırıb. Hazırda “PAŞABank”la əməkdaşlıq çərçivəsində həyata keçirdiyimiz layihənin ümumi dəyəri 55 milyon manatdan artıqdır. Xüsusi vurğulamaq istəyirəm ki, bu, bizim son layihəmiz deyil, 20 il əvvəl çıxdığımız bu yola həmişəki həvəs və enerji ilə davam edəcəyik”.

Tədbirdə çıxış edən “Paşabank” ASC-nin baş direktoru və idarə heyətinin sədri Taleh Kazımov, eləcə də “Azpetrol LTD” MMC-nin baş direktoru Ceyhun Məmmədov ictimai nəqliyyat sahəsinin özünəməxsus çətinlikləri olan və çox məsuliyyətli bir fəaliyyət növü olduğunu qeyd ediblər. İş adamları “Xaliq Faiqoğlu” şirkəti ilə əməkdaşlıqdan məmnunluq ifadə ediblər və həyata keçirilən layihələrin uzunömürlü olacağına inandıqlarını bildiriblər.
Təqdimat mərasiminin yekununda istehsalat bazası və yeni alınmış avtobuslara baxış keçirilib.