ABŞ-da hərbi çevrilişin olacağı ilə bağlı
iddialar yayılıb.
Sfera.az bildirir ki, bu barədə məşhur
"Washington Post” qəzetində yazı dərc olunub.
ABŞ ordusunda çalışmış, ehtiyatda olan 3
general sözügedən məqalədə çevrilişin 2024-cü ildəki seçkilər zamanı baş tuta
biləcəyini qeyd ediblər. Bununla yanaşı, onlar ehtimal olunan vətəndaş müharibəsi
ilə bağlı da həyəcan təbili çalıblar.
Ehtiyatda olan general-mayor Paul
D.Eaton, Antonio M.Taquba və briqada
generalı Stiven M. Andersonun yazdığı məqalədə ABŞ ordusunda komandanlıq zəncirinin
pozulduğuna diqqət çəkilib. Oklahoma Milli Qvardiya komandiri Tomas Mançinonun
Ağ Evin əsgərlərə peyvənd vurulması əmrinə qarşı "Mən əmri Baydendən yox, əyalət
qubernatorundan alıram” ifadələrindən istifadə etməsi də səbəb kimi göstərilib.
"2024-cü ildə hazırkı prezident Co Bayden və
Respublikaçılar Partiyasından olan Donald Tramp və ya ona bənzər biri arasında
mübahisəli seçkilər orduda parçalanmaya, çevriliş cəhdinə və vətəndaş müharibəsinə
səbəb olacaq”, deyə məqalədə qeyd olunub.
Günay Rəsulqızı