Dövlət Sərhəd Xidmətinə məxsus (DSX) avtomobilin sürücüsü qəza törədərək hadisə yerindən qaçıb. Bu barədə zərərçəkmiş sürücü Pərviz Süleymanov Avtosfer.az-a şikayət ünvanlayıb. Onun sözlərinə görə hadisə avqustun 27-də Mərdəkan qəsəbəsinin daxili küçələrinin birində baş verib: “Dövlət Sərhəd Xidmətinə məxsus D 368 XT qeydiyyat nişanlı “MAZ” markalı avtomobilin sürücüsü Elməddin Xasıyev qayda pozaraq mənim idarə etdiyim 10-LL-220 qeydiyyat nişanlı “Toyota” markalı maşını vurub. Hadisə zamanı sürücü və yanındakı rəhbər şəxs polisə məlumat verməməyimi xahiş etdi və dəymiş ziyanı tam şəkildə ödəyəcəyini bildirdi. Qeyd edim ki, avtomobilimə 2470 manat ziyan dəyib”.

Zərərçəkmiş P.Süleymanov bildirir ki, onlar dəymiş ziyana görə 200 manat ödəyib yoxa çıxdılar. “Hal-hazırda sürücü və yanındakı rəhbər şəxsin telefonuna zəng çatmır. Bu barədə DSX-yə şikayət etdim, bundan sonra həmin qurumun mətbuat xidmətindən mənə zəng edərək dəymiş ziyanın ödəniləcəyi ilə bağlı söz verdilər. Lakin yenə də heç kim pulu ödəmədi”.

Ümid edirik ki, aidiyyəti qurumlar baş verən hadisə ilə bağlı tez bir zamanda ölçü götürəcək.

Təbriz