“Türkiyədən gələn mallar ucuzlaşacaq”

“Türkiyədən gələn mallar ucuzlaşacaq” – Natiq Cəfərli

12 Noyabr 2021 | 14:28

OXUNUB: 912

Bu gün Türkiyə lirəsinin Azərbaycan manatı qarşısında rəsmi məzənnəsi 0,1705 manat olub. Bu isə yeni tarixi minimum hesab olunur.

Maraqlıdır, qonşu ölkədə milli valyutanın bu şəkildə ucuzlaşması Azərbaycanla ticari əlaqələrə hansı şəkildə təsir edəcək? Süni qiymət artımı gözləniləndirmi?

Mövzu ilə bağlı Sfera.az-a danışan iqtisadçı ekspert Natiq Cəfərli türk lirəsinin ucuzlaşmasının Azərbaycanda gərginlik yaratdığını bildirib:

"Lirənin ucuzlaşması daxili səbəblərdən qaynaqlanır. Yəni daxildə həm Mərkəzi Bankın faiz dərəcəsini aşağı salması, həm də il sonuna yaxın türk şirkətlərinin xarici borclarının qaytarılması dövrü olması türk lirəsinə basqıları artırır və tarif minimumlardadır. Bunun təbii olaraq, Azərbaycana təsirləri olacaq. Çünki Azərbaycanın ən böyük ticarət tərəfdaşlarından biri Türkiyədir. Lirə davamlı şəkildə dəyərdən düşərsə, Türkiyədən gələn məhsulların ucuzlaşması mümkündür. Bir müddət sonra isə türk məhsullarının Azərbaycan bazarında nəzərə çarpacaq dərəcədə ucuzlaşmasına şahid olacağıq. Bu, müsbət tendensiyadır. Mənfi tendensiya isə ondan ibarət ola bilər ki, bu hal bizdə gərginlik yaradacaq. Vətəndaşlar istər-istəməz düşünür ki, Türkiyədəki bu proses Azərbaycanda da təkrarlana bilər.”.

Ekspert süni qiymət artımının yaranma ehtimalına da münasibət bildirib:

"Normal rəqabətli bazar sistemində süni qiymət artımının olması mümkün deyil. Yəni bazar oyunçuları çox olarsa, süni şəkildə qiyməti artırmaq imkanı olmur. Bu hal bazar oyunçuları az olarsa reallaşa bilər. Yəni bazarda dominant olan bir neçə oyunçu olur ki, onlar da öz aralarında danışaraq müəyyən qədər qiyməti artıra bilirlər. Lakin Türkiyədən əsasən yüngül sənaye məhsulları gətirilir ki, bu sahədə bizdə xeyli sahədə oyunçu var və inhisarçılıq yoxdur. Bu səbəbdən normal rəqabətli mühit yaranacaqsa, qiymət artımı olmayacaq. Süni qiymət artımı bazar institutu çalışan ölkədə mümkün deyil”.

Əzizə Zeynal

Sosial şəbəkələrdə paylaşın: