Gənclik
dövrünün əsas hərəkətverici qüvvələrindən biri hesab olunur. Dünyaya
inteqrasiya, çağdaş zamanla uzlaşmaq baxımından gənc nəslin rolu böyükdür.
Vətənpərvərlik,
milli mənlik ruhuna sahib olan gəncləri isə bir dövlətin sərvəti də hesab etmək
olar. Demək olar ki, bütün ölkələrdə, cəmiyyətlərdə əsas prioritet götürülən keyfiyyətlərdən
biri də məhz budur.
Maraqlıdır,
Azərbaycanda gənc nəslin milli mənlik şüurunun
inkişaf etdirilməsi və vətənpərvərlik hisslərinin tərbiyəsində üsütnülk təşkil
edən amillər hansılardır? Gəncliyin milli mənlik şüuru, vətənpərvərlik hissləri
hansı etapdadır?
Məsələ
ilə bağlı Sfera.az-a danışan deputat Sabir Rüstəmxanlı gəncliyin vətənpərvərlik
ruhunun 80-ci illərdən bu yana ciddi şəkildə inkişaf etdiyini deyib:
"İndiki
vaxtda gənc nəslin milli mənlik şüurunun inkişaf etdirilməsi və vətənpərvərlik hisslərinin
tərbiyəsi məsələsi son dərəcədə ciddidir. 1980-ci illərin ortalarından
başlayaraq Azərbaycanda gəncliyin şüurunu hərəkətə gətirən, milli mənlik duyğusunu
itiləyən əsas amil SSRİ-nin dağılması, SSRİ-yə qarşı Azərbaycanın müstəqilliyinə
istiqamətlənmiş iş idi və bu yeni nəslin tərbiyəsində böyük rol oynamışdı. Müstəqillik
dövründə isə torpaqlarımızın bir qismi işğal olunarkən, gəncliyin vətənpərvərlik,
milli mənlik ruhu ciddi inkişaf yolu keçdi. Bu istiqamətdə istər hərəkat, istərsə
də yazılan ədəbiyyatda biz bunu müşahidə etdik. Ümumilikdə isə milli şüurun
formalaşması üçün məktəb, ailə tərbiyəsi kompleks təşkil etməlidir".
Deputat
gəncliyin vətənpərvərlik ruhunun 44 günlük müharibə dövründə xüsusən qabarıq müşahidə
olunduğunu bildirib:
"Mən
indiki gənlikdən narazı deyiləm. Gənclərin vətənpərvərlik ruhunun hansı səviyyədə
olmasını 44 günlük Vətən müharibəsi dövründə də gördük. Azərbaycanın bütün bölgələrində,
hətta uşaqlar belə bu dövrdə hazır idilər ki, savaşa getsinlər. Yəni, Azərbaycan
gəncinin vətənpərvərlik ruhunun inkişafının hansı səviyyədə olduğunu bütün
dünya görə bildi. Yeni gənclikdən müəyyən mənada yaşlı nəsil gileyli qala
bilir, lakin indiki məqamda belə bir əsas yoxdur".
Deputat Azər Badamov gənc
nəslin vətənpərvərlik ruhunun müəyyən mərhələlər üzrə inkişaf etdiyini
bildirib:
"Gənclik
ölkənin gələcəyidir və dövlətin strateji olaraq möhkəmlənməsi, eləcə də əbədi
olmasının qarantıdır. Buna görə də ölkəmizdə düzgün istiqamətlənmiş gənclər
siyasəti həyata keçirilir. Bu gənclər siyasətinin məqsədi isə milli mənəvi dəyərlərə
uyğun gənc nəsilin tərbiyə edilməsi və sağlam gənc nəsilin formalaşdırılmasından
ibarətdir.
Gənc nəsilin
tərbiyə edilməsi ancaq dövlət vəzifəsi olmamalıdır. Ailədən başlayaraq hər bir
uşaq gənc vaxtlarından milli vətənpərvərlik ruhunda tərbiyə olunmalıdır. Digər
bir istiqamət isə məktəb illərində sağlam gənc nəsilin yetişdirilməsi ilə bağlı
xüsusi proqramlar icra olunmalıdır. Xüsusi dərslər keçirilməlidir. Ölkənin
tarixi, bu günü və gələcəyi haqqında gənc nəsildə düzgün təəssürat və fikir
formalaşdırılmalıdır. O cümlədən yetkin gənc nəsilin tərbiyə olunması
universitet səviyyəsində müəyyən layihə və proqramlara cəlb etməklə təmin
olunmalıdır".
Deputat bütün gəncliyin eyni milli ruhla tərbiyə etməyin
mümkünsüzlüyündən də danışıb:
"Mühüm
məqamlardan biri də ali təhsil almış ixtisaslı gənc nəsilin işlə təmin olunması
istiqamətində işlərdir. Yəni, gənc boş dayanmamalı, səmərəli əməklə məşğul
olmalıdır. Düşüncələri həm vətənpərvərlik, həm milli-mənəvi dəyərlər, həm də müəyyən
fəaliyyətlə qarışmalıdır. Bütün bu istiqamətlər gənclərimizin gələcəyinin müəyyənləşdirilməsində
mühüm rol oynayır. Bütün gəncliyi vətənpərvərlik ruhunda milli-mənəvi şüurla tərbiyə
etmək qeyri-mümkündür.
Gəncliyimizin
əsas hissəsi dövlətə sədaqətli və sadiqdir. Bu özünü 44 günlük Vətən müharibəsində
də göstərdi. Bütün gənclərimiz dəmir yumruq altında səfərbər oldular və hər kəsin
bir məqsədi oldu. Bir nəfər belə fərari olmadı. Hamı ölkə ərazisinin bütövlüyü
uğrunda düşməni öldürməyə və qəhrəmanlıq göstərməyə hazır olduğunu bildirdi.
Bizim əldə etdiyimiz ən böyük dəyər budur".
Əzizə
Zeynal
Yazı
Medianın İnkişafı Agentliyinin maliyyə dəstəyi ilə hazırlanıb.