Gürcüstan hökuməti avtomobil yanacağı ilə bağlı yeni standartlar tətbiq edəcək. Benzinin keyfiyyət normalarının Avropa standartlarına daha da yaxınlaşdırılması ilə bağlı hökumətin müvafiq qərarına düzəlişlər edilib.

Avtosfer.az AZƏRTAC-a istinadən bildirir ki, bu barədə Gürcüstanın Ətraf Mühitin Mühafizəsi və Kənd Təsərrüfatı Nazirliyi məlumat yayıb.

Bildirilir ki, qərara benzinin keyfiyyət standartlarına avtomobil nəqliyyatı vasitələrində yanma prosesini yaxşılaşdıracaq yeni parametrlər əlavə olunub.

Bunun nəticəsində atmosferə azot dioksidi və karbon qazının buraxılması azalacaq.

Yeni parametrlərin əlavə olunması benzinin qiymətinə təsir etməyəcək.

Qurumdan bildirilib ki, Gürcüstanda benzinin keyfiyyəti 2017-ci ildən tədricən yaxşılaşdırılıb və hazırda ekoloji parametrlərinə görə "Avro 5" standartına uyğundur.