ABŞ-ın Aeronavtika və Kosmik Fəzanın Tədqiqatı üzrə Milli İdarəsi (NASA) gələcək planlarının reallaşdırılması üçün xarici dövlətlərdə və Amerikada fəaliyyət göstərən özəl sektorlarla əməkdaşlıq etmək niyyətindədir. Bu barədə NASA rəhbərinin idarəolunan proqramlar üzrə yeni müavini Keti Lidersin müəllif şərhində deyilir.

“Kosmosun tədqiqatı komanda idman növüdür. Kainat böyükdür və bizim komandada bütün oyunçulara yer çatar. Günəş sistemində insan iştirakının miqyasının genişləndirilməsi bütün aspektləri əhatə edən birgə səylərdən asılıdır. Elmi və ya texnoloji sahələrdə, NASA-da, özəl sektorda və ya digər ölkələrdə çalışmağımızdan asılı olmayaraq, yalnız birgə fəaliyyət göstərməklə böyük nailiyyət əldə edə bilərik”, - Keti Liders NASA-nın “Artemis” ay proqramına həsr olunan rəsmi bloqunda belə yazıb.

Dörd ildən sonra insanı Aya çatdıra biləcək yeganə kosmik gəminin ABŞ-da hazırlanan SLS (Space Launch System) və “Orion” olduğunu vurğulayan NASA nümayəndəsi Ay ətrafında ekipajla birgə ilk uçuş sınağının 2023-cü ildə keçiriləcəyini təsdiqləyib. Onun sözlərinə görə, ABŞ “Gateway” ayətrafı stansiyasını xarici tərəfdaşlarla birgə hazırlamaq istəyir. Bu stansiya dayanıqlı Ay əməliyyatları, həmçinin Günəş sisteminin, o cümlədən Marsın tədqiqi üçün mühüm rol oynayacaq.

2019-cu ilin yazında NASA üç etapdan ibarət “Artemis” Ay proqramı layihəsini elan edib. Birinci mərhələdə “Orion” kosmik gəmisi SLS raketi ilə birgə ay ətrafında pilotsuz uçuş həyata keçirəcək və Yerə qayıdacaq. İkinci mərhələdə kosmik gəmi ekipajla birgə Yerin təbii peyki ətrafında dövrə vuracaq. Üçüncü mərhələ isə 2024-cü ildə astronavtların Aya enməsini və təxminən 2030-cu illərin ortalarında Marsa idarəolunan kosmik gəmi göndərilməsini nəzərdə tutur. (AZƏRTAC)