Lənkəranda avtomobil divara çırpılıb, bir nəfər yaralanıb. Avtosfer.az-ın APA-ya istinadən verdiyi məlumata görə, qəza rayonun Vilvan kəndində baş verib. Cil kənd sakini, 1998-ci il təvəllüdlü Şahhüseyn Şəfi oğlu Nəsirzadə idarəetməni itirərək “VAZ 2106” markalı avtomobillə yol kənarındakı yarımtikiliyə çırpılıb. Deformasiyaya uğrayan avtomobilin içindən yaxınlıqdakıların köməyilə çıxarılan sürücü sol qulaqda cırılmış yara, boğaz və alın nahiyəsində sıyrıntılarla rayon xəstəxanasının travmatologiya şöbəsinə yerləşdirilib. Vəziyyəti normaldır. Ehtimal edilir ki, qəzaya dumanlı hava şəraiti səbəb olub.

Faktla bağlı araşdırma aparılır.