İtaliyanın "Salernitana" komandasının futbolçusu Frank Riberi yol-nəqliyyat qəzasına düşüb.

Avtosfer.az-ın məlumatına görə, hadisə vaxtı fransalı yarımmüdafiəçi avtomobilin sərnişini olub. Maşının işıqforla toqquşması nəticəsində 38 yaşlı oyunçu başından yüngül zədə alıb. Onun bərpasına bir həftəyədək vaxt lazım olacaq.

"Corriere dello Sport" xəbər verir ki, insident fevralın 27-nə keçən gecə yerli vaxtla saat 3-də baş verib. Aldığı xəsarət üzündən Riberi A Seriyasında XXVI turun "İnter"lə martın 4-də Milanda keçiriləcək görüşündə iştirak etməyəcək.

Təcrübəli futbolçu cari mövsüm 16 oyunda 2 məhsuldar ötürmə müəllifi olub. Hazırda "Salernitana" 25 matçdan 15 xalla 20-ci yerdə gedir.

"Report"