Çeçenistanda minik avtomobilinin iştirakı ilə ağır yol qəzası baş verib. Avtosfer.az xəbər verir ki, hadisə Vedensk rayonu ərazisində qeydə alınıb. Bu barədə respublikanın Daxili İşlər Nazirliyinin Mətbuat Xidmətinin regional qrupundan məlumat verilib.

Məlumata görə, dağlıq ərazidə yerləşən “Buni – Makaj” avtomagistralında hərəkətdə olan “Toyota Camri” markalı minik avtomobili, sürücünün idarəetməsindən çıxaraq uçuruma yuvarlanıb. Qəza nəticəsində 1 nəfər ölüb, 3 nəfər isə xəsarət alıb.

Sürücü və 2 sərnişin ağır vəziyyətdə, hadisə yerinə cəlb edilən təcili tibbi yardım briqadasının köməkliyi ilə Şalinsk rayon xəstəxanasına çatdırılıblar.

Faktla əlaqədar araşdırmalara başlanılıb.

Namiq Musayev