Sentyabrın 15-dən 16-na keçən gecə, saat 03.30 radələrində Bakıda avtoxuliqanlıq edən 3 sürücü saxlanılıb. Avtosfer.az-ın əldə etdiyi məlumata görə, hadisə Səbail rayonu, Üzeyir Hacıbəyli küçəsində baş verib. “Ravon”, «BMW» və “VAZ-2107” markalı avtomobillərin sürücüləri yol hərəkəti qaydalarını və əhalininin dincliyini davamlı olaraq pozmaqla avtoxuliqanlıq ediblər. Ərazidə xidmət aparan Bakı şəhər Dövlət Yol Polisi İdarəsinin YPX Alayının əməkdaşları hər üç sürücünü saxlayıb və onlar aidiyyəti üzrə Səbail rayon Polis İdarəsinin 39-cu polis bölməsinə təhvil verilib. Avtomaşınlar isə duracağa yerləşdirilib.

Bölmədə aparılan araşdırmalar zamanı məlum olub, “VAZ-2107” markalı nəqliyyat vasitəsi ilə avtoxuliqanlıq edən sürücü Vətən Müharibəsi qazisi Tural Umudovdur. Hazırda araşdırmalar davam edir.

27 yaşlı sürücü Tural Umudovun bu hərəkətləri qınanmalıdır. İkinci Qarabağ Müharibəsində döyüşən hər bir vətəndaşımız, şəhidimiz, qazimiz başımızın tacıdır. Amma bəzi qazilərimizin cəmiyyət arasında neqativ hərəkətlərə yol verməsi Vətən Müharibəsi kimi müqəddəs missiyada iştiraka uyğun gəlmir.

Qazi adını avtoxuliqan adına qədər ucuz tutmaq olmaz. Qazi cəmiyyətdə ona olan diqqət və qayğıdan, hörmətdən sui-istifadə etməməlidir. Vətən uğrunda döyüşmək kimi müqəddəs bir işin üzərindən intizamsızlıq edərək xətt çəkmək olmaz.

Elmin