Tanınmış məşqçi Kamil Zeynallı sürücülərin avtomobillərə quraşdırdığı qeyri-qanuni siqnallara qarşı çıxaraq video çəkib və sosial şəbəkələrdə paylaşıb. Avtosfer.az bildirir ki, çoxavazlı səs siqnalları insanları, evdə yatan uşaqları, yaşlıları narahat edir. Kamil Zeynallı bu mövzuya toxunaraq sürücüləri bu mədəniyyətsiz vərdişdən yayınmağa səsləyib: "Gəlin, mədəniyyətimizi pozmayaq, qanundan kənara çıxmayaq və bu cür səs siqnallarından istifadə etməyək".

Bakı Şəhər Dövlət Yol Polisi İdarəsinin bölmə rəisi Vaqif Əsədov Avtosfer.az-a açıqlamasında bildirib ki, vətəndaşın bu əməlini alqışlayır və o da sürücülərə bir daha xatırladır ki, çoxavazlı səs siqnallarının istifadəsi "Yol hərəkəti haqqında" qanunun 74-cü maddəsinə görə qadağandır. Bu siqnalları avtomobilinə quraşdıran sürücülər cərimələnir və siqnallar müsadirə olunur.

Sonda Vaqif Əsədov onu da qeyd edib ki, yaşayış məntəqəsində səs siqnallarından istifadə qadağandır, siqnal yalnız hər hansı bir qəza anının qarşısını almaq üçün xəbərdarlıq olaraq verilə bilər. 

Aysel