Rusiyanın Sverdlovsk əyalətində iki minik avtomobilinin iştirakı ilə ağır yol qəzası baş verib. Avtosfer.az xəbər verir ki, hadisə mayın 24-də Boqdanoviç rayonu ərazisində qeydə alınıb. Bu barədə Rusiya Daxili İşlər Nazirliyini Mətbuat Xidmətinin Regional qrupundan məlumat verilib. 

Məlumata görə, 1957-ci il təvəllüdlü sürücü idarə etdiyi “Volqa” markalı avtomobillə hərəkətdə olarkən, ötmə əməliyyatını yerinə yetirib və bu zaman yolun əks istiqamətinə çıxaraq qarşıdan gələn “Toyota Land Cruiser”lə toqquşub. Qəza nəticəsində “Volqa”nın sürücü ilə qadın sərnişini aldıqları xəsarətlərdən hadisə yerində vəfat ediblər. “Volqa”nın daha bir sərnişini və “Toyota”da olan 3 nəfər, hadisə yerinə çağırılan təcili tibbi yardım briqadasının köməkliyi ilə xəstəxanaya çatdırılıb.

Baş verən qəzanın görüntüləri təhlükəsizlik kamerasına düşüb.

Namiq Musayev