Qonşu Türkiyə, Gürcüstan kimi ölkələrdən fərqli olaraq, Azərbaycandakı otellərin fəaliyyəti tənqid hədəfi olur desək, yanılmarıq. Vətəndaşlar turizm regionlarındakı otellərin xidmət və qiymət səviyyəsindən narazılıq edir. Özəlliklə, 5 ulduzlu otellərin bahalılığından şikayətlər səslənir.

Sfera.az Türkiyə, Gürcüstan və Azərbaycandakı bir neçə 5 ulduzlu oteli əsas alaraq onların təkliflərini və neçəyə başa gəldiklərini müqayisə edib. 

Antalya "Hotel SU & Aqualand” adlı 5 ulduzlu otel - Çimərliyə 2 dəqiqəlik məsafədə olan  otel müasir minimalist dizayn və geniş spa təklif edir

 

 

Oteldə açıq hovuz və 5 yemək variantı var. Hər bir qonaq üçün xüsusi yeməklər və pulsuz tualet əşyaları təqdim olunur. Ümumiyyətlə, otelin təqdim etdiyi xidmətlərin sayı kifayət qədərdir – 2 hovuz (1 açıq), spa və sağlamlıq mərkəzi, fitness mərkəzi, otaq xidməti, əlil qonaqlar üçün imkanlar, sahil barı, səhər yeməyi və s. 

Əsas maraqlı məqam isə təbii ki, qiymətlərlə bağlıdır. Otelin 1 həftəlik qiyməti  vergilər və rüsumlar daxil olmaqla, 2 nəfər üçün 1 040 manat təşkil edir.  Bu rəqəm təklif edilən digər özəlliklərə görə də dəyişə bilir. Məsələn, səhər yeməyi ilə yanaşı, axşam yeməyi də olduğu halda, qiymət 1 495 manat olacaq. Eləcə də 3 nəfər üçün səhər yeməyi daxil məbləğ 1 560 manata qədər yüksəlir.

Bodrum – "Radisson Collection Hotel” adlı 5 ulduzlu otel - Çimərliyə 150 metr məsafədə yerləşən otel bar, bağ və özəl çimərlik sahəsi kimi müxtəlif imkanlar təklif edir.

 

 

 

Türkiyədən fərqli olaraq, qonşu Gürcüstanda qiymətlər daha ucuzdur.

Batumi – "Heaven's Palace” adlı 5 ulduzlu otel

 

 

 

Batumi çimərliyindən 150 metr məsafədə yerləşən otel balkon və pulsuz "WiFi” ilə kondisionerli yaşayış yeri təklif edir. Hər bir bölmədə tam təchiz olunmuş mətbəx, düz ekran TV, divan çarpayısı olan qonaq otağı, şəxsi vanna otağı və paltaryuyan maşın var. Məşhur özəllikləri - 1 hovuz,  pulsuz Wi-Fi , pulsuz parkinq, ailə otaqları və s.  Oteldə 1 həftə qalmaq 2 nəfər üçün 811 manata başa gəlir. Bu rəqəm 4 nəfər üçün olanda isə 1 351 manata yüksəlir.

Tiflis – "Hotel Ethnograph old Tbilisi” adlı otel

 

 

İndi isə sıra Azərbaycanda yerləşən 5 ulduzlu otellərə gəldi:

Bakı – "Vip Apartment On France Embassy” adlı otel 

 

 

Qız Qalasından təxminən 1 km məsafədə yerləşən, şəhər mənzərəli otel restoran, bar və ortaq istirahət otağı təklif edir. Burada hər gün halal səhər yeməyi verilir. Əsas özəllikləri - hava limanına servis (pulsuz), spa və sağlamlıq mərkəzi, fitnes mərkəzi, otaq xidməti, pulsuz parkinq. Otelin 1 həftəlik qiyməti  1 nəfər üçün səhər yeməyi də daxil olmaqla, 2 800 manat təşkil edir.

Lənkəran – "Lankaran Springs Wellness Resort” adlı otel 

 

 

Burada bar, bağ, spa və sağlamlıq mərkəzi, terras var. Təklif edilənlər sırasına  restoran, otaq xidməti, uşaq klubu və pulsuz WiFi daxildir. Oteldə qapalı hovuz, fitness mərkəzi, karaoke də mövcuddur. Əsas özəllikləri – 1 hovuz, bar, səhər yeməyi.  Otelin 1 həftəlik qiyməti  vergilər və rüsumlar daxil olmaqla, 2 nəfər üçün 1 125 manat təşkil edir. Bu rəqəm təklif edilən digər özəlliklərə görə də dəyişə bilir. Məsələn, səhər yeməyi ilə yanaşı, axşam yeməyi də olduğu halda, 1 nəfər üçün qiymət 1 055 manatdır.

 

Qeyd edək ki, bu qiymətlər 18-25 aprel tarixləri üçün hesablanıb. Tətil mövsümündə qiymətlərin daha da yüksələcəyi təxmin edilir.

Göründüyü kimi, Türkiyə otelləri daha çox xidmət, gözəl mənzərə, dəniz və hovuz keyfi təklif etsə də, qiymətlər bu xidmətlərə görə uyğundur. Gürcüstanda təkliflər Türkiyədəki qədər geniş olmasa da, qiymət fərqi  bunu tarazlayır. Azərbaycanda isə xidmətlər qardaş ölkə ilə yarışa bilmədiyi halda, qiymətlər yerli turisti xarici ölkəyə üz tutmağa vadar edəcək səviyyədədir. Xarici turistlərin isə bu qiymət və təkliflərlə qonşu ölkələri qoyub bizi seçmələri çətin görünür. 

 

Qeyd edək ki, bu vəziyyət sadəcə yuxarıda adı çəkilən, nümunə olaraq təqdim etdiyimiz otellərlə bağlı deyil. Bu ölkələrdəki hər hansı 5 ulduzlu otelin müqayisəsi təxminən eyni nəticəni verəcək. 

Mövzu ilə bağlı Sfera.az-a açıqlama verən Otellər və Restoranlar Assosiasiyası İdarə Heyətinin sədri Samir Dübəndi bildirib ki, bir çox 5 ulduzlu otel müxtəlif beynəlxalq şəbəkələrin bir hissəsidirlər: 

"Bəziləri həmin şəbəkələrə məxsusdurlar, bəziləri də şirkətlər tərəfindən idarə olunurlar.  Məsələn, bizim ölkədə bir çox 5 ulduzlu otel hansısa beynəlxalq şəbəkəyə aiddirlər. Ona görə onların qiymətləri ölkələr üzrə o qədər də dəyişmir.  Hər bir ölkənin əsas sosial, iqtisadi göstəriciləri nəzərə alınaraq, təbii ki, brendlər qiymətlərini dəyişkən müəyyən edə bilirlər. Başa düşürük ki, bu qiymətlər yalnız otellərdə formalaşmır – oteldən bu təşəbbüs çıxır və ya hansısa şəbəkənin otelidirsə, onun baş ofisində həmin qiymətlər mövsimi xarakter daşıya bilər və s.  O ki qaldı, təklif olunan xidmət çeşidlərinin daha geniş olmasına, dediyim kimi,  5 ulduzluların  bir çoxu zəncirlərə və şəbəkələrə bağlı olan  otellər olduğu üçün onların da qlobal siyasətində əks olunmuş bir sıra əlavə xidmətlər qeyd olunur. Yəni bu istiqamətdə çətin ki, fərq olsun. Lakin beynəlxalq şəbəkələrə aid olmayan 5 ulduzlu otellər də var. Bu gün Azərbaycanda ulduz kateqoriyasının verilmə prosesi hələ ki ləng gedir”.

 

"Bu o deməkdir ki, otellər təsnif olunmalı, kateqoriya almalıdırlar. Açılan otelə 6 ay müddət verilir ki, o, işlərini qaydasına salandan sonra ulduz kateqoriyasını almaq üçün müraciət etsin. Bu baxımdan hazırda 5 ulduz kateqoriyası daşıyan otellərin bəziləri o kateqoriyaya uyğun deyillər. Digər tərəfdən beynəlxalq aqreqatorlarda otellər özlərinə heç də dövlət tərəfindən verilməmiş ulduzları göstərə bilirlər. Bu problemi bir çox ölkələr yaşasa da, həll yolu da var. Dövlət bu kimi aqreqatorların rəhbərliyi ilə əlaqə saxlayıb onlara müraciət edərək sadəcə bir qaydanın tətbiq olunmasını xahiş edə bilər ki, ulduz kateqoriyasının göstərilməsi yalnız dövlətin verdiyi sənədin surətinin təqdim olunması ilə həll edilsin. Əks halda, hansısa satış kanalında yanlış göstərilən ulduz kateqoriyası turistlərin gözləntilərini qarşılamır, təbii ki, bu da nəticədə onların hüquqların pozulmasına gətirib çıxarır. Ümumiyyətlə, təkcə 5 ulduzlu otellərə deyil, kateqoriyalaşma məsələsinə ciddi yanaşmaq lazımdır. Bu proses yalnız bir qurum tərəfindən həyata keçirilə bilməz – alternativləri olmalıdır, digər qurumlarda bu işdə iştirak edə bilərlər”.