Bunu Sfera.az-a açıqlamasında politoloq Əlimusa İbrahimov deyib. Ekspert ötən gün Azərbaycan və Ermənistan XİN rəhbərləri Ceyhun Bayramov və Ararat Mirzoyan arasındakı telefon danışığını belə dəyərləndirib:

"Bir neçə ay bundan qabaq hər iki tərəfin nazirlərinin birbaşa danışığını təsəvvür etmək mümkün deyildi. Rusiyanın artıq bütün regionda təsir dairəsi azalıb. Lakin Rusiya buna qarşıdır və Mirzoyanla Lavrov arasındakı görüşdə sözügedən məsələ vurğulanmışdı. Rusiya münaqişəyə nəzarət mexanizmini hələ də davam etdirməkdədir. Kremlin istəyindən asılı olmayaraq, mövcud gerçəklik dəyişməyəcək”.

Ekspert bundan sonrakı mərhələdə Azərbaycan və Ermənistanın hökumət rəsmiləri arasında danışıqların çoxalacağına da diqqət çəkib:

"Dünən baş tutan telefon danışığının digər səbəblərindən biri də Brüssel görüşüdür. Belə ki, görüşdə vurğulanmışdı ki, tərəflər arasında birbaşa danışıqlar aparılmalıdır. Problemlərin həll olunması artıq iki tərəfin iradəsindən asılıdır. Yaxın zamanlarda yekun nəticəyə nail olmaq məsələsi isə şübhəli qalır. Belə ki, iki tərəf arasında sülhün əldə olunmasına qarşı olan qüvvələr hələ də mövcuddur. Lakin proses artıq başlayıb və bu kimi danışıqların ardı gələcək”.