Dünyanın ən güclü ordularından biri kimi tanınan Rusiya ordusunun Ukraynada gözlənilməz müqavimətlə qarşılaşması və qısa zamanda istədiyini ala bilməməsi gündəmdədir.

Dünya mətbuatı ağır itkilərə məruz qalan Rusiya ordusunun müharibədəki uğursuzluğunun səbəblərini araşdırıb. 

Sfera.az xəbər verir ki, ABŞ-ın məşhur "Washinqton Post” qəzeti Rusiya ordusunun uğursuzluğa düçar olmasına gətirən 9 səbəbini oxucularına çatdıraraq regiondakı vəziyyət haqqında müfəssəl məlumat verib.

Qəzetin yazdığına görə, ən böyük səhv ukraynalıların müqavimət qabiliyyətini lazımınca qiymətləndirməmək olub. Rusiya tez və asan qələbə qazanmağı planlaşdırsa da, Ukrayna buna Qərbin silahları ilə cavab verib. Təkcə ordu qüvvələri deyil, həmçinin mülki şəxslər Rusiyanın irəliləməsini əngəlləməyə çalışdılar.

Əsir düşən rus əsgərlərinin ifadələrinə əsasən, bir çox bölmə Ukraynaya daxil olacaqlarından xəbərsiz olub. Onlardan bəziləri müharibənin onlara hərbi təlimdə iştirak kimi təqdim edildiyini qeyd ediblər. Digərləri isə təkcə Donbas bölgəsinə göndərildiklərini bilirdilər. Rus əsgərləri bu müharibəyə psixoloji cəhətdən hazır deyildilər.

Rus qoşunları qarşılaşdıqları şəraitə də hazır deyildilər. Özləri ilə götürdükləri iki həftəlik qida ehtiyatı tez tükəndi. Müharibənin gedişatında rus əsgərlərinin yanacaqları bitdiyi üçün yol kənarında əlacsız və ac vəziyyətdə qaldıqlarını və əsgərlərin dükanları qarət etdiyini əks etdirən videolar ortaya çıxdı.

Qoşunların ərzaq və digər təchizatları tükəndikdə komandirlərin hər hansı planı yox idi. Bu səbəblə tanklar hərəkətsiz qaldı.

Hərbi ekspertlərin fikrincə, rus qüvvələri sərhədi keçməzdən əvvəl Ukraynanın hava hücumundan müdafiə sistemlərinin məhv ediləcəyini gözləyirdilər. Onlar hava dəstəyi olmadan Ukraynaya daxil oldular. "Washington Post” bunu komandirlərin aşağı dərəcəli müqavimətlə qarşılaşacaqlarını səhv hesablamaları ilə əlaqələndirir. Ukrayna hərbi təyyarələrinin işğaldan 7 həftə sonra hələ də havada olduqları qeyd olunur.

İşğal dörd cəbhədə - şimalda Kiyevə, şimal-şərqdə Xarkova, şərqdə və cənubda Krıma doğru başladıldı. İlk müqavimət başlayanda qoşunlar ölkə sərhədləri boyunca düzülmüşdü. Bu, onsuz da qeyri-kafi təchizat xətlərini genişləndirdi.

Ruslar böyük bir müharibəyə daxil oldular. Kommunikasiya üçün mobil telefonlar və köhnə radiolardan istifadə etdilər. Bununla da ukraynalılar rusların cəbhədəki hərəkətləri ilə bağlı mesajların qarşısını aldılar. Qəzet yazır ki, 7 rus generalından bir neçəsi ukraynalılar onların mövqeləri ilə bağlı mesajları əldə etdikləri üçün həlak olublar.

Ekspertlər qeyd edirlər ki, Rusiyanın mərkəzləşdirilmiş ordusu meydandakı əsgərlərə qərar qəbul etmək və ya əmr vermək səlahiyyəti vermirlər. Cəbhədə çətinliklərlə üzləşən qoşunlar Moskvada öz rəislərinin əmrini gözləməyə məcbur olurlar.

Rusiya qoşunları açıq şəkildə müqavimətlə qarşılaşacaqları ssenariyə hazır deyildilər. Görünən budur ki, onların hər hansı B planı yox idi. Əvəzində qoşunlar əvvəlcə əmr edildiyi kimi irəliləməyə davam etdilər. Bu da onları asan şəkildə hədəfə çevirdi.