Bununla bağlı Sfera.az-a açıqlama verən politoloq Məhəmməd Əsədullazadə deyib ki, Azərbaycanın Fərrux əməliyyatı və silahlı erməni birləşmələrinə qarşı hazırlıqları Avropa İttifaqı və ABŞ-ın iki ölkə arasında danışıqlar prosesinin başlanması üçün hərəkətə keçməsinə gətirib çıxarıb. Onun sözlərinə görə, ABŞ iki ölkə arasında vasitəçi missiyasını həyata keçirir, prosesi isə Avropa İttifaqı aparır:

"ABŞ dövlət katibinin zəngi iki ölkə arasında artıq sühün əldə olunmasına və Brüssel görüşünün nəticə ilə sonlanmasına hesablanıb. ABŞ-ın Ermənistana maliyyə yardımını azaltmasını və Qarabağda etnik ermənilər üçün gələn il maliyyə yardımı ayırmamasını, məhz İrəvana qarşı təzyiq kimi xarakterizə etmək olar. Ayrılan yardımlar separatizmin inkişafına və Ermənistanın təcavüzkar siyasətinin davamına gətirir. Bu da Rusiyanın geosiyasi maraqlarına xidmət edir”.

Müsahibimiz qeyd edib ki,  Rusiya sülhməramlı qüvvələrinin nəzarət etdiyi ərazilərdə etnik ermənilərə maliyyə yardımı Vaşinqtonun maraqlarına cavab vermir:

"Çünki buradakı separatçılar birbaşa Moskvanın təlimatı ilə hərəkət edirlər. ABŞ da artıq Rusiyanın regiondan çəkilməsi üçün Ermənistanla Azərbaycan arasında sülhün əldə edilməsində maraqlıdır. Yeni geosiyasi reallıqlar bunu labüd edir. Brüssel görüşü  öncəsi Putinin tərəflərlə telefon danışığı və ABŞ dövlət katibinin iki dəfə zəngi göstərir ki, hər iki tərəf proseslərdə maraqlıdır. Amma Vaşinqtonun yanaşması real sülhə yaxındır. Ona görə də görüşə bir gün qalmış Ermənistanın real danışıqları pozmaması üçün zəng etdi. Ermənistanın növbəti dəfə prosesi pozması əleyhinə işləyəcək”.