"Rusiya
və Ukrayna arasında Türkiyənin vasitəçiliyi ilə aparılan danışıqlar müsbətə
doğru dəyişir. Bu, Ankaranın Şərqi Avropada və Qara dənizdə Rusiya qarşısında üstünlüyünə
gətirib çıxara bilər”.
Sfera.az xəbər verir ki, bu sözləri politoloq
Məhəmməd Əsədullazadə deyib.
Onun sözlərinə görə müharibədən
sonra Türkiyə-Rusiya əməkdaşlığı əvvəlki səviyyədə olmayacaq:
"Çünki Türkiyə Rusiyanın apardığı
siyasəti regional təhlükəsizliyinə təhdid görür. Qeyd edim ki, Türkiyə bundan sonra Rusiyadan silah almayacaq. Xüsusilə S-400 havadan müdafiə sistemlərinin
alışı və Türkiyədə birgə istehsalı real görünmür.
Bu müharibə Rusiyanın silah ticarəti
bazarına mənfi təsir etməklə, onun yerini Türkiyənin tutması mümkündür. Türkiyənin
modern silahları Rusiyanın silahlarını geri qoydu. Bundan əlavə, Türkiyə kifayət
qədər Şərqi Avropa, Qara dəniz, Cənubi Qafqaz və Mərkəzi Asiyada mövqelərini
gücləndirəcək”.
Politoloqun sözlərinə görə,
Rusiya
və Ukrayna arasında sülhün əldə olunmasında Türkiyənin vasitəçiliyi mümkündür:
"Əgər, R. T. Ərdoğan iki ölkə
prezidentlərini İstanbulda bir araya gətirib sülh müqaviləsinin bağlanmasına
nail olarsa, Ankara beynəlxalq sülh yaradan ölkə statusunu alacaq. Həmçinin bu
Türkiyənin daxili siyasətində R.T. Ərdoğanın reytinqini yüksəldəcək. 2023-cü ildə Türkiyədə keçiriləcək seçkilər AKP-nin qələbə əldə etməsilə nəticələnəcək.
Təbii ki, AKP-nin hakimiyyətdə qalması
Azərbaycanın da maraqlarına cavab verir. Regionda başlanan geostrateji porseslərin
davamı məhz AKP-nin hakimiyyətdə qalmasını labüd edir”.
Turan Rzayev
Sfera.az