Xəbər verdiyimiz kimi, Roskomnadzor
(Rabitə, İnformasiya Texnologiyaları və Kütləvi İnformasiya Vasitələrinə Nəzarət
Federal Xidməti) Rusiya-Ukrayna müharibəsi barədə xəbərlər verən, mövzu ilə
bağlı analitik yazılarla çıxış edən Azərbaycanın üç saytına (Oxu.az, minval.az,
haqqin.az) öz ərazisində girişi bloklayıb. Heç bir məlumat, xəbərdarlıq edilmədən
atılan bu addım birbaşa söz azadlığına, demokratiyaya, plüralizmə zidddir.
Mövzu ilə bağlı Sfera.az-a açıqlama
verən jurnalist, Ayna.az saytının təsisçisi və redaktoru, Azərbaycan Yazıçılar
İttifaqının üzvü, Azərbaycan Jurnalistlər Birliyinin sədri
Elçin Şıxlı deyib
ki, adıçəkilən saytların Rusiya ərazisində girişinin bloklanmasını böyük hadisə
hesab etmirəm.
"Məsələ ondadır ki, bu hazırkı
Rusiya hakimiyyəti üçün adi haldır. Onlar əleyhinə deyilən ən adi söz belə onları özündən çıxarır. Bunu ona görə deyirəm ki, nə "oxu.az", nə "minval.az", nə də "haqqın.az" Rusiya ictimai fikrinə təsir edə biləcək potensialda
saytlardır. Rusların özlərinin öz ictimai fikrinə təsir edəcək kifayət qədər
kütləvi informasiya vasitələri var. Ancaq bununla belə onlar bizim saytların
fikirlərindən də çəkinir”.
E. Şıxlı Azərbaycanın da bəznər
formada Rusiya saytlarının ölkə ərazisində bloklanması fikrinə münasibət
bildirib:
"Mən bundan öncə də dəfələrlə demişəm
ki, Azərbaycanda fəaliyyət göstərən "Raşa Tudey” nəşri və onun törəmələrindən
olan "Sputnik Azərbaycan”ın Azərbaycanda fəaliyyəti dayandırılmalıdır. Onsuz da
hazırda Avropanın əksər ölkələrində həm "Raşa Tudey”, həm də "Sputnik Azərbaycan”ın
yayımı dayandırılıb. Hesab edirəm ki, bu addımı biz də atmalıyıq. Ən azından bunu
Rusiya-Ukrayna müharibəsi gedişində etməliyik. Çünki müharibə dövründə həmin
media qurumlarının fəaliyyətinə baxdıqda, onların bağlanmasının zəruri olduğunu
görə bilərik.
"Sputnik Azərbaycan”ın yeni təyin
edilən rəhbəri separatçı Cənubi Osetiya da "Sputnik"in keçmiş rəhbəridir.
Həmin adam həm də Rusiya xüsusi xidmət orqanlarının əməkdaşı olub. Bu şəxsin Azərbaycana
göndərilməsi bizim üçün heç də müsbət hal deyil”.
Turan Rzayev