Evdə nadir hallarda bir yerdə tapılan həyat yoldaşları daha çox hava limanında qarşılaşırlar. Lalə və Möhsüm Qasımovlar 10 ildən artıqdır ki, AZAL-da bələdçi işləyirlər. Onların hekayəsi təkcə peşənin incəlikləri, ailə, sevgi və qarşılıqlı anlaşma haqqında deyil, həm də uçuş zamanı qarşılaşdıqları məsuliyyətli, bəzən isə əvəzolunmaz iş təcrübəsi ilə bağlıdır.

Aviatravel.az saytı sözügedən cütlük barədə məqalə dərc edib.

Həmin məqaləni təqdim edirik:

Aviasiyaya gedən yol

Lalə: Aviasiyaya kortəbii gəldim. Səyahət agentliklərinin birində vakansiya gördüm və müraciət etdim (söhbət 2009-cu ildən gedir), bu agentlik isə özəl aviaşirkətin ofisi ilə üzbəüz idi. O, bələdçiləri işə götürürdü. CV-mi oraya da verdim və tezliklə müsahibəyə dəvət olundum. Bu gün 12 ildən artıqdır ki, səmadayam. Bunlardan 11 ili - milli aviaşirkətimiz olan “Azərbaycan Hava Yolları”ndadır.

Mən bu peşəyə asanlıqla daxil oldum, amma bu, o demək deyil ki, yol bu qədər sadədir. Müsahibə, hərtərəfli tibbi müayinə, xüsusi hazırlıq və çoxsaylı təlimlərin mərhələlərindən keçmək lazımdır. Və bütün bunlardan sonra gələcək stüardessalara uçmağa icazə verilir, lakin əvvəlcə kursant kimi.

Möhsüm: Bələdçi peşəsinə mərhələli şəkildə keçdim. O vaxta qədər mənim mülki aviasiya təcrübəm var idi, bir müddət milli aviaşirkətdə müxtəlif vəzifələrdə çalışmışdım. Özəl aviaşirkətdə bələdçilərin işə götürülməsi haqqında dostlarımdan eşitdim, özüm üçün yeni bir sahənin “dadına baxmağa” qərar verdim. Mən və Lalə (həyat yoldaşı) eyni vaxtda bu aviaşirkətə işə qəbul olunduq. Müsahibə və sual-cavablardan, tibbi müayinədən, təlimdən sonra ilk sınaq (stajçı) uçuşum “Tu-154” təyyarəsində baş tutdu - bu, Mineralnıye Vodıya oldu. 17 ildir aviasiyadayam.

Möcüzələr yaradan bir təbəssüm

Möhsüm: Uçuş bələdçiləri uçuş zamanı baş verə biləcək hər-hansı bir fövqəladə vəziyyətə hazırdırlar.

Fiziki və ya əqli cəhətdən sağlam olmayan namizəd bu vakansiyaya alınmayacaq. Bələdçilər sakit, nəzakətli, özünü idarəetmə qabiliyyəti yüksək, ünsiyyətcil, yaraşıqlı olmalı, fikirlərini aydın və dəqiq ifadə etməli, empatiya qurmağı bacarmalıdırlar.

Lalə: Həm də səbirli olun və pis əhval-ruhiyyədə olsa da, yaxşı dostlar kimi sərnişinlərə mehribanlıqla gülümsəyin. Pis əhvalımızı yerdə qoyub təyyarənin salonuna girib gülümsəyirik. Açıq və səmimi təbəssüm əsl möcüzələr yaradır, hətta ən “çətin” sərnişinləri də sakitləşdirir.

Qaydaları pozan sərnişinlər

Lalə: Uçuş zamanı çox vaxt bizə uçmaqdan dəhşətli dərəcədə qorxan insanlar - aerofoblar yaxınlaşırlar. Biz onların hisslərini mümkün qədər yumşaltmağa, qorxu və gərginliyin öhdəsindən gəlməyi öyrətməyə çalışırıq. Bəzən də sərnişinlər biletlərin və ya baqajın qiyməti ilə bağlı suallarla bizə müraciət edirlər.

Uçuş bələdçilərində bu məlumat yoxdur, bu baxımdan ən yaxşısı, aviaşirkətin rəsmi saytına daxil olmaq və ya zəng mərkəzinə müraciət etməkdir. Amma hava yollarının təhlükəsizlik qaydalarına məhəl qoymayan sərnişinlərə də rast gəlmək olur.

Məsələn, bəzi insanlar “təhlükəsizlik kəmərlərini bağlayın” işarəsinə məhəl qoymur və kabinə ətrafında gəzirlər. Yaxud əylənmək üçün təyyarənin göyərtəsində müəyyən ifadələr və sözlər söyləyərək zarafatlaşırlar.

Möhsüm: Belə zarafatlar heç də gülməli deyil. Onlar təkcə sərnişinlər arasında yersiz çaxnaşma deyil, bütün təyyarədə panika yarada (təyyarə qalxmayıbsa) və ya təyyarənin təcili enişinə (təyyarə uçuşdadırsa) səbəb ola bilər. Biz “zarafatçı”ya izah etməliyik ki, onun bu davranışı cəza ilə nəticələnə – hətta həbs oluna bilərlər.

Aviaşirkətin qaydalarını pozduqda sərnişinə şifahi xəbərdarlıq edilir. Əgər onun hərəkətləri hələ də idarəolunmazdırsa, ona yazılı xəbərdarlıq edilir. Çatan kimi hüquq-mühafizə orqanlarının nümayəndələri onunla söhbət edirlər. Həmçinin sərnişin, məsələn, uçuşun gecikməsi və ya onun təqsiri üzündən başqa hava limanında təyyarənin planlaşdırılmamış enişinə görə baş vermiş bütün cərimələri ödəməli olacaq.

Üzən qrafiklə...

Möhsüm: “Saat 09:00-10:00-dan 18:00-19:00” qrafiki işimizə yaddır. Günün saatından asılı olmayaraq uçuruq, adi ofis işçisi kimi evə saat 18:00-da və ya səhər 5-də də qayıda bilərik. Uçuşdan xeyli əvvəl gəlirik, vaxt zonalarını daim dəyişirik, nadir hallarda evdə görünürük, qohumları daha az görürük. Amma biz vacib məlumatlarla doluyuq: biz bütün növ sərnişin təyyarələrini, mümkün fövqəladə eniş üçün təhlükəsizlik tədbirlərini, sərnişinlərə ilk tibbi yardımın göstərilməsi qaydalarını və s. bilirik. Bütün işlərimiz sərnişinlərin təhlükəsizliyi və rahatlığının təmin edilməsi ilə bağlıdır.

Lalə: Həqiqətən, lazımlı, faydalı və məsuliyyətli bir işlə məşğul olduğumu dərk etmək məni yeni bir şövqlə işimə aşiq edir. Bu peşənin dadına baxıb yerə enmək və uçmaq hissi olmadan işləmək çətindir. Hər uçuş həyatdan kiçik, lakin çox maraqlı bir kadrdır.

Mehriban ailə olan komanda haqqında

Möhsüm: İstənilən məsələdə bir-birinə kömək etməyə, dəstəyə hazır olan bələdçilərdən ibarət gözəl, mehriban komandamız var. Hər uçuş üçün yeni briqada yaradılır, onun tərkibi daim dəyişir. Bir heyət rəhbəri kimi mənim vəzifələrimə onun işini təşkil etmək daxildir. Hər-hansı bir ekipaj üçün heyət rəhbərinin uçuş başlamazdan əvvəl pozitiv yanaşması vacibdir. Beləliklə, məlumat daha yaxşı mübadilə edilir və hər bir ekipaj üzvü stres olmadan sakit şəkildə öz məsuliyyət sahəsində işləyir. Şəxsən mənim ekipajımın uçuş zamanı nəyinsə öhdəsindən gələ bilmədiyi hal yoxdur.

Dostluqla başlayan sevgi haqqında

Möhsüm: Həyat yoldaşımla eyni vaxtda özəl aviaşirkətdə bələdçi kimi işə başladıq, bir yerdə işləyirdik. Evlənməzdən əvvəl biz çox uzun müddət dost idik, hər gün eyni şirkətdə ünsiyyət qurur və görüşürdük. İki illik dostluqdan sonra onunla görüşmək üçün atasından icazə istədim, ona fərqli davrandığımı və Lalə ilə bağlı niyyətlərimin çox ciddi olduğunu söylədim.

Lalə: Ondan əvvəl isə inadkarlığı həyatımı xilas etdi. Birdən xəstələndim, özümü pis hiss etdim, halbuki uçuşa hazırlaşırdım. Amma o, inadıma baxmayaraq, məni həkimə apardı. Kəskin apendisit diaqnozu qoyuldu və təcili cərrahi müdaxilə tələb olundu. Onun inadkarlığı olmasaydı, bilmirəm, necə olacaqdı.

Toy günü 

Lalə: Həyat yoldaşım da mülki aviasiya ilə sıx bağlı olduğundan toyu 2 İyun - Mülki Aviasiya İşçiləri Günündə keçirməyi planlaşdırmışdıq. Amma həmin gün üçün demək olar ki, bütün şadlıq evləri əvvəlcədən sifariş edilmişdi. Toy tarixini bir gün qabağa təxirə salmalı oldum, heç də az əlamətdar olmayan bir gündə - Uşaqların Beynəlxalq Müdafiəsi Günündə etdik.

Birlikdə uça bilməmək 

Lalə: Aviaşirkətin qaydalarına görə, bizə birlikdə uçmaq qadağandır - həyat yoldaşları eyni reysə çıxa bilməzlər. Həm də çox şanslıyam ki, ömür-gün yoldaşım mənimlə eyni peşədəndir. Evdə ikinci yarının qeyri-sabit cədvəlinə dözməyə hazır deyillərsə, çox vaxt iş və ailə arasında seçim etməlisiniz. Amma biz bir-birimizi başa düşürük, ailədə dəstək oluruq, uşaqlarla qalanda bir-birimizi əvəz edirik. Bizim iki gözəl övladımız var.

Ailədə kim rəhbərdir

Lalə: Mütləq ər! Birlikdə müzakirə edirik, bütün nüansları danışırıq, bir-birimizi dinləyirik, bütün müsbət və mənfi cəhətləri deyirik. Amma bizim ailədə son qərar Möhsümündür. Mən hər məsələdə ona güvənirəm.

Möhsüm: Ailə xoşbəxtliyinin açarı hörmət və etibardır. Bütün bunlar varsa, o zaman tam və xoşbəxt münasibət qurmaq mümkündür.