Rusiyanın Novosibirsk şəhərində kişi başqasının maşınına tros taxaraq onu park edildiyi yerdən uzaqlaşdırıb, sonra isə öz avtomobilini onun yerinə yerləşdirib.

Bu barədə 360 TV xəbər yayıb.

Bu vaxt yerindən uzaqlaşdırılan maşının sahibi pəncərədən baş verənləri görərək kameraya çəkib, sonra isə polisə xəbər verib.

Kadrlarda “Land Cruiser Prado”nun sahibinin maşınından trosu çıxardaraq, yolunun üstündə dayanan “Nissan Qashqai”ni kənara çəkdiyi, sonra isə yaşadığı binanın qarşısına yollandığı görünür.

Sosial şəbəkələrdə kadrlar birmənalı qarşılanmayıb. İstifadəçilərin bəziləri “Nissan” sahibinin maşını düzgün yerdə park etmədiyini deyərək kişinin tərəfini tutublar, digərləri isə hər nə olursa-olsun belə hərəkəti yolverilməz hesab ediblər.