Son 30 il ərzində Cənub qütbündə havanın temperaturu yüksəlib. Bu barədə “Nature Climate Change” elmi jurnalında nəşr olunan yeni araşdırmada bildirilib.

Qeyd olunub ki, hər on ildə temperatur təxminən 0,6 dərəcə artıb.

Bildirilir ki, bunun səbəblərindən biri Sakit Okeanın şərqindəki dəniz səthində temperaturun artmasıdır. Bu da öz növbəsində Ueddell dənizində siklon anomaliyası yaradıb. Nəticədə siklon digər geofiziki amillərlə birlikdə Cənub qütbdən isti nəmli hava axınının keçməsini asanlaşdırıb.

“Reuters” agentliyi isə qeyd edir ki, antropogen amil də temperaturun qalxmasında mühüm rol oynayıb.

Agentlik 30 il ərzində (2018-ci ilə qədər) Cənub qütbdə orta temperaturun 1,8 dərəcəyə qədər artdığını açıqlayıb. 20 meteoroloji stansiyadan alınan məlumatlara görə, Cənub qütbündə temperatur artımı bütün Antarktida üçün hesab edilən orta səviyyədən yeddi dəfə yüksək olub. (“Report”)