Sfera.az-ın məlumatına görə, ifaçının qumar borcu səbəbilə ölüm təhdidləri aldığı bildirilib. Bu barədə türkiyəli yazar və sənət adamı Onur Akay məlumat yayıb. 

"Sərdar qumar borcuna görə ölüm təhdidləri alıb və buna görə bankdan kredit çəkib. Eyni zamanda o, mahnılarının müəllif hüquqlarını iş adamına satıb və 5 il müddətinə 1 milyon lirə alıb. Yəni mahnılar Serdar Ortaçın imzası altında qalsa da, artıq 5 il müəllif hüquqları qorunmayacaq. Mahnıları harda səslənirsə, kim oxuyursa, pulunu satdığı iş adamı alacaq. Əldə etdiyim məlumata görə, Ortaç qumarda 459 min 670 dollar uduzub”, - deyə Akay söyləyib. 

Digər tərəfdən son zamanlar müğənninin adı mütəşəkkil cinayətkarlar lideri Sedat Pekerin bəhs etdiyi qanunsuz mərc siyahısında da hallanıb. Ortaçın, həmçinin hazırlıq mərhələsində olan "Best Of Serdar" albomunun hüquqlarını Ozan Çolakoğluna 200 min lirəyə satması da iddialar arasında yer alıb.

Qeyd edək ki, borcları ilə bağlı Sərdar Ortaç axırıncı dəfə "Banka 10 milyon, keçmiş həyat yoldaşım Kloe Luqnana 600 min lirə aliment borcum var. Mənim də aylıq xərcim təxminən 500 min lirədir”, - deyə bildirmişdi.