"Aqrar Subsidiya Şurasının yaradılması ilə ilk növbədə bu sahədə ciddi operativ idarəetmə sistemi formalaşacaq. Ən azından subsidiya üçün verilən vəsaitin düzgün idarəolunması, yönləndirilməsi məsələsi həyata keçəcək” Sfera.az-a açıqlamasında bu sözləri Prezident İlham Əliyevin "Kənd təsərrüfatı məhsulları istehsalının subsidiyalaşdırılması Qaydası”haqqında verdiyi qərarda Aqrar Subsidiya Şurasının yaradılması məsələsinə toxunarkən kənd təsərrüfatı üzrə ekspert Nicat Nəsirov deyib: "Bütün elektron bazada göstəricilər göstəriləcək. Bu istiqamətdə indiyə kimi olan süni hallar tamamilə aradan qalxacaq. Etiraf edək ki, indiyə qədər 10 hektarda əkin əkən fermerə bir sıra hallarda 25-50 hektar yazırdılar. Artıq isə göstəricilər reallığı əks etdirəcək. 2007-ci ildən subsidiya proqramının həyata keçməsilə aqrar sektorda mühüm nəticələr əldə olunub, iqtisadi fəallıq artıb, yeni müəssisələr qurulub, təkrar torpaq bazarı formalaşıb. Amma buna baxmayaraq, aparılan tədbirlər açığı keyfiyyət göstəricilərinə təsir etməyib. Yeni sistemdəki müəyyən detallar, əmsalların tətbiq olunması, ölkəyə lazım olan məhsulların dövlət sifarişi əsasında əkilməsi imkan verəcək ki, məhsuldarlıq göstəricisində də sağlam rəqabət yaransın”.

Ekspert bildirdi ki, subsidiya bundan sonra əsasən sağlam toxum və bitkilərdən istifadə edən fermerlərə veriləcək: "Əsas şərtlərdən biri də odur ki, fermerlər sağlam toxum materialları, bitkilərindən istifadə etməlidirlər. Bu mənada onlara daha çox subsidiya veriləcək. Kopperasiyalaşma, xüsusi subsidiyalaşmaya cəlb olunmaq yeni sistemin ən mühüm üstünlüklərindən biridir. Hələ keçən ildən bu istiqamətdə işlər gedirdi. Kənd təsərrüfatında əsas problemimiz torpaqlardan səmərəli istifadə ilə bağlıdır ki, ümid edirəm atılan addımla bu məsələ də öz həllini tapacaq”. Qeyd edək ki, bundan sonra Azərbaycanda fermerlərə subdisiyanın verilməsi ilə bağlı qərarı Aqrar Subsidiya Şurası verəcək. Belə ki, bu məsələ Prezident İlham Əliyevin keçən həftə sonu təsdiqlədiyi "Kənd təsərrüfatı məhsulları istehsalının subsidiyalaşdırılması Qaydası” nda bu məqam öz əksini tapıb.

ELÇİN