Xəbər verdiyimiz kimi, Prezident İlham Əliyev Azərbaycan Respublikası Daxili İşlər Nazirliyinin zabitlərinə ali xüsusi rütbələrin verilməsi haqqında sərəncam imzalayıb.

Avtosfer.az xəbər verir ki, general-mayor ali hərbi rütbəsi alan Canpolad Alı oğlu Daanov DİN-in Polis Akademiyasının rəisidir.

Ali hərbi rütbəyə layiq görülən Namiq Zirəddin oğlu Həsənov DİN-in Baş Əməliyyat Statistik və İnformasiya İdarəsinin rəisidir.

General-mayor rütbəsi alan Vüqar Hidayət oğlu Ələkbərov Bakı Şəhər Baş Polis İdarəsinin əməliyyat işi üzrə rəis müavinidir.

Vüqar Ələkbərov - 1975-ci ildə Naxçıvanda anadan olub. 2004-cü ildə DİN-in Polis Akademiyasını bitirib. 1998-ci ildən xidmətə başlayıb və müxtəlif məsul vəzifələrdə işləyib. 2009-2014-cü illərdə Baş Mütəşəkkil Cinayətkarlıqla Mübarizə İdarəsində bölmə, şöbə rəisi, 2014-2020-ci illərdə BŞBPİ-də idarə rəisi vəzifələrində çalışıb.

2020-ci ildən BŞBPİ-nin rəisinin müavini, daha sonra rəisin əməliyyat işi üzrə müavini vəzifəsinə təyin olunub.

“İgidliyə görə” medalı ilə təltif edilib. Ailəlidir, iki övladı var.

Prezident tərəfindən Ali hərbi rütbəyə layiq görülən digər polis zabiti isə Bakı Şəhər Baş Polis İdarəsinin rəis müavini, Sərdar Süleyman oğlu Səfərovdur.

1973-cü ildə Sumqayıtda anadan olub. Dövlət Bədən Tərbiyəsi İnstitutunu, Türkiyə Respublikasının Jandarma Zabitlər Məktəbini və DİN-in Polis Akademiyasını bitirib.

1996-2005-ci illərdə Daxili qoşunlarda xüsusi təyinatlı bölük komandiri, Xüsusi təyinatlı taborun qərargah rəisi kimi xidmət edib. 2019-2022-ci illərdə Bakı Şəhər Baş Polis İdarəsinin İctimai Təhlükəsizlik İdarəsinin rəis müavini və həmin İdarənin rəisi olub. Bu ilin fevralndan BŞBPİ rəisinin xidmət üzrə müavini vəzifəsinə təyin olunub.

“Hərbi xidmətlərə görə”, "İgidliyə  görə", “Vətən uğrunda” medalları ilə təltif edilib. Ailəlidir, üç övladı var.