Gəncədə sanitar-karantin qaydaları ilə bağlı monitorinq keçirilib.

Polis əməkdaşları monitorinqə ictimai nəqliyyat, yəni avtobus və taksilərin yoxlanılması ilə başlayıb.

Sürücülərin tibbi maskadan istifadə etməsinə, COVID-19 pasportunun olub-olmamasına diqqət edilib. Hərəkət iştirakçılarının diqqətinə çatdırılıb ki, hər bir şəxs sosial məsuliyyət çərçivəsində tətbiq edilən qaydalara qeyd-şərtsiz əməl etməli, mövcud qaydaları anlayışla qarşılamalıdır. Karantin qaydalararını pozan şəxslər barəsində inzibati protokol tərtib edilib.

Polis əməkdaşları şəhər ərazisindəki mehmanxana, kafe-restoranlardakı müştəri və personalların COVID-19 pasportunun olub-olmamasını yoxlayıblar. Polis əməkdaşları obyekt sahibləri ilə izahedici-profilaktiki söhbətlər apararaq, koronavirus infeksiyasının fəsadları və mövcud sanitar-gigiyenik tələblər izah ediblər. Bildirilib ki, qeyd edilən məkanlarda müvafiq dezinfeksiya vasitələri olmalı, xidmət personalı mövcud sanitar qaydalarına riayət etməli, müştərilərə də bu qaydalar xatırladılmalıdır.

Daha sonra monitorinq tədbirləri fəaliyyətinə qanunamüvafiq qaydada icazə verilən şadlıq evləri ilə davam etdirilib. Mərasimə dəvət olunan qonaqların COVİD-19 pasportu olub-olmaması yoxlanılıb. COVİD-19 pasportu olmayan şəxslər restorana buraxılmayıb.