“Ukraynanın paytaxtı Kiyevdə Kremlin göstərişi əsasında 400-dən çox muzdlu fəaliyyət göstərir”.

“Qafqazinfo” xəbər verir ki, bu barədə məlumatı Böyük Britaniyanın “The Times” nəşri yayıb.

“Rusiya Prezidenti Vladimir Putinə yaxın şəxs olan oliqarx Yevgeni Priqojin tərəfindən idarə olunan “Vaqner” adlı özəl hərbi şirkət 5 həftə əvvəl Afrikadan muzdlular göndərib. Muzdluların missiyası Ukrayna Prezidenti Vladimir Zelenskini və hökumət üzvlərini qətlə yetirmək və hökumətin Rusiyanın nəzarətinə keçməsi üçün zəmin yaratmaq olub”, - deyə məlumatda qeyd olunub.

Fotoda Yevgeni Priqojin

Bildirilir ki, Ukrayna hökuməti bu barədə fevralın 26-sı səhər saatlarında məlumat əldə edib. Bundan bir neçə saat sonra Kiyev şəhərini diversantlardan təmizləmək üçün 36 saatlıq sərt komendant saatı tətbiq edildiyi elan olunub.

Nəşr yazır ki, muzdlular hücuma keçmək üçün lazımi göstərişi gözləyirlər: “Onların siyahısında ölkənin Baş naziri, Nazirlər Kabinetinin bütün üzvləri, Kiyev meri Vitaliy Kliçko və onun qardaşı Vladimir, ümumilikdə isə 23 nəfər var”.