"Rusiya çalışır ki, iyun-iyul aylarında Bakı ilə İrəvan
arasında sərhədlərin müəyyənləşməsi prosesi bəlli bir həll nöqtəsinə çatsın.
Ona görə də Ankara ilə birlikdə prosesə yeni təkan vermək istəyir”.
Bu sözləri Sfera.az-a açıqlamasında iyunun 30-da
Antalyada Türkiyə Xarici işlər naziri Mövlud Çavuşoğlu ilə Rusiya Xarici İşlər
naziri Sergey Lavrov arasında olacaq görüşü dəyərləndirərkən, politoloq Qabil
Hüseynli deyib:
"Bu, adi görüş olmayacaq. Çavuşoğlu ilə Lavrov
arasında baş tutacaq görüşdə müzakirə ediləcək məsələlər siyahısında Cənubi
Qafqazla bağlı proseslərin öndə olacağını düşünürəm. Əsas diqqət Azərbaycan Ermənistan
münasibətlərinə yönəldiləcək. Amma Suriya və Liviya məsələləri də müzakirə
predmeti olacaq”.
Politoloqa görə, görüşdə Bakı ilə İrəvan arasında sərhədlərin
delimitasiya və demarkasiyası, bu zaman işçi heyətinin yaradılması və prosesdə
hansı xəritələrdən yararlanmaq, habelə sərhədlərin müəyyənləşdirilməsində daha
dəqiq texniki vasitə olaraq peyk rabitəsindən istifadə edilməsi kimi məsələlər
danışıqlar mövzusu olacaq:
"Sərhədlər müəyyənləşmədən kommunikasiyaların
açılması gündəmə gəlməyəcək. Həmçinin bu danışıqlarda Qarabağın statusu gündəmdə
deyil. Demirəm ki, Antalyada dediyim məsələ ilə bağlı bütün nüanslar razılaşdırılacaq.
Amma hər halda güman edirəm ki, görüşdə
Qarabağ məsələsinin həllinə doğru bəlli bir məsafə qət ediləcək. Prosesdə
çıxılmaz hesab edilən bir sıra məsələlər razılaşdırılacaq. Uzağı, ilin
sonlarına doğru böyük sülh sazişi müzakirə üçün stolun üzərinə gətirilə bilər”.
Rüfət SULTAN