Avstraliyada elm adamları smartfondan istifadə edərək xarab südün aşkarlanması üsulunu işləyib hazırlayıblar .

Sfera.az "Oddity Central"a istinadən xəbər verir ki, Yeni Cənubi Uels Universitetinin avstraliyalı alimləri smartfonların vibrasiya mühərrikindən istifadə etməklə südün təzəliyini yoxlamaq üçün yeni üsul hazırlayıblar. VibMilk adlanan yeni sensor qablaşdırmanı açmadan məhsulun keyfiyyətini təyin edə bilir, xarab olma ehtimalını azaldır və bununla da süd tullantıları azalır.

Professor Wen Hu qeyd edib ki, VibMilk bakteriya ilə təmas riski olmadan təravət testinə imkan verən qeyri-invaziv həlldir. Texnologiya vibrasiyaya məruz qaldıqda südün sıxlıq və özlülük kimi fiziki xüsusiyyətlərində baş verən dəyişikliklərin təhlilinə əsaslanır.

Dörd ümumi smartfon modelində aparılan sınaqlar metodun effektivliyini göstərib: südün pH-nın təyin edilməsinin dəqiqliyi 98,35%, təzəlik sahəsində isə 100% təşkil edib. Tədqiqat qrupu hazırda texnologiyanı təkmilləşdirmək üçün qablaşdırmanın siqnallara təsirini araşdırmağa davam edir.

İnci