İranın
xarici işlər naziri Hüseyn Əmir Abdullahian və Birləşmiş Millətlər Təşkilatının
(BMT) baş katibi Antonio Quterreş arasında telefon danışığı zamanı nüvə
razılaşması müzakirə olunub.
Sfera.az
xəbər verir ki, İran Xarici İşlər Nazirliyinin verdiyi məlumatda Quterreş və
Abdullahianın regional və beynəlxalq məsələləri, Əfqanıstandakı hadisələri, eləcə
də Vyanada nüvə müzakirələri haqda fikir mübadiləsi aparıblar.
Vyana
danışıqlarında İranın "yaxşı bir razılaşma əldə etməyə" çalışdığını təkrarlayan
İran rəsmisi qarşı tərəfin nüvə anlaşmasındakı bütün öhdəliklərinə qayıtmalı
olduğunu qeyd edib. O, bu halda İranın da atdığı addımları dayandıracağını sözlərinə
əlavə edib.
Vyanada
keçirilən əvvəlki 6 müzakirə mərhələsini də diqqətdən kənarda saxlamadıqlarını
bildirən Abdullahian yeni hökumət olaraq qiymətləndirmələr etmək və mübahisəli
mövzularda danışıqlar aparmaq istədiklərini, bunun onların haqqı olduğunu diqqətə
çatdırıb.
İranlı
nazir Beynəlxalq Atom Enerjisi Agentliyinin (MAQATE) direktoru Rafael Qrossinin
Tehran səfərinə toxunaraq agentliklə texniki əməkdaşlığı davam etdirəcəklərini
bildirib.
Quterreş
öz növbəsində nüvə danışıqlarının bərpasından məmnunluğunu və dəstəyini ifadə
edərək razılaşmaya ümid etdiyini dilə gətirib.
O,
Əfqanıstanla bağlı sanksiyalara baxmayaraq bu ölkənin iqtisadiyyatına pul
axınını təmin etmək üçün Dünya Bankının dəstəyi ilə beynəlxalq fond yaratmağa
çalışdıqlarını vurğulayıb.
Əzizə
Zeynal