Qırğızıstanda Tacikistanla münaqişə zamanı onlarla bina yanıb.
Sfera.az-ın məlumatına görə, bu barədə respublikanın Fövqəladə Hallar Nazirliyinin mətbuat xidmətindən bildirildi.
Bütün dağıntılar Batken vilayətinin payına düşüb. Sözügedən vilayətin Leylək rayonunun Kulundu kəndində iki, Maksat kəndində isə on ev və bir məktəb məhv edilib.
"Batken rayonunda doqquz yaşayış binasında, on yanacaqdoldurma məntəqəsində, iki restoranda, səkkiz mağazada, keçmiş kazinonun binalarından birində və bir sərhəd postunda yanğın baş verib. Ak-Say kəndində isə Fövqəladə Hallar Nazirliyinin yanğın - xilasetmə hissəsinin binasında yanğın olub",- deyə nazirlikdən əlavə edilib.
Xatırladaq ki, aprelin 29-da Qırğızıstanla Tacikistan arasındakı sərhəd bölgələrinin yerli sakinləri arasında baş verən münaqişə silahlı qarşıdurmaya çevrildi. Qırğız və tacik hərbçiləri arasında toqquşmalar altı saatdan çox davam etdi.
Qanlı olay nəticəsində hər iki tərəfdən 150-dən çox insan yaralanıb, 20 nəfər həlak olub. Dünən axşam tərəflər atəşkəs və qüvvələrin geri çəkilməsi barədə razılığa gəliblər.
Qeyd edək ki, sözügedən region vaxtaşırı qarşıdurma zonasına çevrilir,bunun əsas səbəbi isə mübahisəli sərhəd sahələridir.
Selcan
Sfera.az