Bakı Şəhər Dövlət Yol Polisi İdarəsi bu gün paytaxtda avtobus zolaqlarına daxil olan digər nəqliyyat vasitələrinə qarşı reyd həyata keçirib.

Sfera.az xəbər verir ki, reyd çərçivəsində qaydaları pozan sürücülər barəsində inzibati tənbeh tədbirləri görülüb.

İdarənin ictimaiyyətlə əlaqələr şöbəsinin rəisi Toğrul Nəsirli bildirib ki, tədbirlər Bakı Şəhər Dövlət Yol Polisi İdarəsinin ümumi istifadədə olan nəqliyyat vasitələrinin rahat və fasiləsiz hərəkətinin təmin edilməsi istiqamətində mütəmadi olaraq həyata keçirdiyi nəzarət-profilaktiki tədbirlər çərçivəsində baş tutub: 

“Təssüflə qeyd etməliyəm ki, edilən xəbardarlıqlara baxmayaraq yenə də bəzi sürücülər həmin zolağa daxil olaraq avtobusların hərəkətinə maneə yaradırlar. Nəzərə almaq lazımdır ki, bu qayda pozuntusu olmaqla yanaşı, həm də öz növbəsində inzibati məsuliyyət yaradır. Bu gün paytaxt ərazisində keçirilən tədbirlər zamanı həmin sürücülər saxlanılıb, onlarla profilaktiki söhbətlər aparılıb və mövcud qanunvericiliyin tələbləri barədə məlumatlar verilib. Bütün bunları nəzərə alaraq, sürücülərdən xahişimiz eyni zamanda tələbimiz ondan ibarətdir ki, yol hərəkəti qaydalarına ciddi şəkildə riayət etsinlər. Unutmaq olmaz ki, ani diqqətsizlik arzuolunmaz hadisələrin baş verməsinə səbəb ola bilər”.